हेलो सेन्सेइ - (७३) उपचारका लागि आफन्तलाई जापान बोलाउनुपरेमा.....

टोकियो – जापानमा रहेका नेपालीहरुका लागि भिसा, यहाँको करप्रणाली, व्यवसायिक कारोवारको लेखा व्यवस्थापन र सो संग सम्बन्धित लाग्ने कर लगायतका विविध बिषयमा जानकारीमुलक स्तम्भ ‘हेलो सेन्सेइ !’ मा यसपटक हामी बाबुआमा वा आफन्तलाई उपचारका लागि जापान बोलाउनुपरेमा त्यसको भिसा प्रक्रिया बारेमा जानकारी गराउने प्रयास गरिएको छ । विदेशीहरु उपचारका लागि जापान आउनुपरेमा उनीहरुका लागि मेडिकल स्टे (इर्‍योउ ताइजाई) भिसाको ब्यवस्था छ ।
मेडिकल स्टे भिसा छोटो अवधिको भएमा ९० दिनको र अर्को ६ महिना वा १ वर्षसम्मको निर्दिष्ट गतिविधि भिसा (तोकुतेइ खाचुदोउ) हुन्छ । जापानका अस्पताल वा क्लिनिकमा उपचार गर्न आउने विदेशीका लागि यस्तो भिसाको ब्यवस्था गरिएको हो । जापानको अस्पतालमा बिरामी भर्ना नै हुनुपर्ने अवस्था हो भने ६ महिना वा १ वर्षका लागि तोकुतेइ खाचुदोउ भिसा आवेदन गर्न सकिन्छ । यस्तो अवस्थामा अध्यागमन ब्युरोबाट ‘योग्यताको प्रमाणपत्र’ (इलिजिबिलिटी) निकाल्नुपर्दछ । उपचार गर्ने बिरामी व्यक्तिका अतिरिक्त हेरचाह गर्ने व्यक्तिका लागि पनि यो भिसाको सुबिधा उपलब्ध छ । उक्त व्यक्ति परिवारको सदस्य, आफन्त वा नर्स पनि हुन सक्छन् तर हेरचाह गरेबापत तलब लिनेको हकमा भने यो सुबिधा उपलब्ध हुँदैन । बिरामीको आफ्नै पारिवारिक सदस्य नभएको अवस्थामा परिवार बाहिरको ब्यक्तिको सहयोग लिनुपरेमा निजसंग बिरामीको सम्बन्ध बारे स्पष्ट खुलाउनुपर्दछ ।

छोटो अवधि अर्थात ९० दिनका लागि भिसाको आवेदन गर्दा आवश्यक पर्ने कागजातहरू
१. राहदानीको प्रतिलिपी
२. फोटो
३. आवेदन फाराम
४. अस्पताल वा क्लिनिकको ‘अनुसूचित परामर्शको प्रमाणपत्र’ यो बिरामीको उपचारका लागि अस्पताल वा क्लिनिकद्वारा दिईने प्रमाणपत्र हो ।
५. ग्यारेन्टी संस्था (मिमोतोहोसो) को ‘ग्यारेन्टी लेटर’ यो जापान सरकारमा दर्ता भएको मेडिकल संयोजक वा जापान सरकारमा दर्ता भएको ट्राभल एजेन्सी जस्ता ग्यारेन्टी संस्थाको ग्यारेन्टी पत्रको कुरा हो ।
६. बैंक ब्यालेन्स प्रमाणपत्र ।
७. उपचार तालिका
छ महिना वा १ वर्ष तोकुतेइ खाचुदोउ भिसा आवेदन गर्दा आवश्यक पर्ने कागजातहरू
१. आवेदन फारम
२. फोटो
३. राहदानीको प्रतिलिपी
४. अस्पताल वा क्लिनिकमा भर्ना हुनका लागि बुकिङ गरिएको निस्सा
५. अस्पताल वा क्लिनिकको पर्चा वा ब्रोशर
६. उपचार तालिका
७. अस्पतालमा भर्ना हुनु अघि र पछि कहाँ बस्ने भन्ने पुष्टि हुने प्रमाण
८. बैंक ब्यालेन्स सर्टिफिकेट वा पूर्व भुक्तानी गरिसकेको भए सो को रसिद
९. बिमा छिर्नुभएको छ भने सो को कागजात
१०. स्पोन्सरको ग्यारेन्टीपत्र
११. भिसाका लागि आवेदन गर्दा अस्पताल वा क्लिनिकको तालिका प्रमाणपत्र र ग्यारेन्टर संस्थाबाट सर्टिफिकेट अफ ग्यारेन्टीपत्र
१२. हेरचाहका लागि नियुक्त व्यक्तिको जापान बसाईको तालिका र खर्चको ग्यारेन्टी कसले गर्ने भनेर पुष्टि गर्ने कागजात

स्मरण रहोस् अस्पतालबाट डिस्चार्ज भइसकेपछि थप अस्पताल जान नपर्ने भएमा बिरामी तथा सुसारेले जापान छोड्नुपर्दछ । छोटो अवधिका आगन्तुक भिसा र मेडिकल स्टे भिसामा रहेका व्यक्तिहरूले जापानको राष्ट्रिय स्वास्थ्य बीमामा छिर्न मिल्दैन । तसर्थ अस्पताल वा क्लिनिकमा पैसा तिर्दा जापानी बीमा प्रयोग गर्न मिल्दैन त्यसैले जापानमा बस्नेहरूले भन्दा उनीहरुले बढी पैसा अर्थात शतप्रतिशत तिर्नुपर्ने हुन्छ ।

यहाँनेर एउटा घटना उल्लेख गर्नु सान्दर्भिक होला, सन् २०१७ मा थाइल्याण्डबाट घुम्न आएका एक जना थाई नागरिक उएनोमा अचानक ढलेका थिए । उनलाई एम्बुलेन्सबाट अस्पताल लगियो । उनी मुटुको गम्भीर बिरामी रहेछन् तर पनि उनको ज्यान जोगियो । अस्पतालमा तिर्नुपर्ने पैसाका लागि भने जापानको राष्ट्रिय स्वास्थ्य बीमा र यात्रा बीमा नभएकोले अस्पतालमा तिर्नुपर्ने पैसा शतप्रतिशत लाग्यो । जसअनुसार उनले तिर्नुपर्ने बिल लगभग १८ मिलियन येन आएको थियो । जसलाई जापानका सञ्चार माध्यमहरुले महत्वकासाथ समाचार लेखेका थिए । निज बिरामीले एकमुष्ट तिर्न नसक्ने भएपछि मासिक किस्ताबन्दीमा तिर्ने ब्यवस्था मिलाईएको थियो । त्यसो भएको हुनाले उपचार प्रयोजनका लागि आउनेहरुले जापानको अस्पतालमा लाग्ने अति महंगो खर्चका बारेमा पनि राम्रोसंग बुझेर मात्रै योजना बनाउँदा बुद्धिमानी हुन्छ ।

Resource Person: Ogawa Bunkei
Licensed tax accountant, Gyoseisyoshi Lawyer
Email: ogawa@saitama-kaikei.net or info@gmt-intl.com
Tel: 03-6903-8817 Mob.070-4339-497

प्रकाशित मिति: आइतबार, कार्तिक १२, २०८०

प्रकाशित समय: ११:५२:०९