हेलो सेन्सेइ (७१) विदेशीले जापानी पासपोर्ट लिनुपरेमा .....

टोकियो – जापानमा रहेका नेपालीहरुका लागि भिसा, यहाँको करप्रणाली, व्यवसायिक कारोवारको लेखा व्यवस्थापन र सो संग सम्बन्धित लाग्ने कर लगायतका विविध बिषयमा जानकारीमुलक स्तम्भ ‘हेलो सेन्सेइ !’ मा यसपटक हामी विदेशीहरूले जापानी राष्ट्रियता ग्रहण गर्ने प्रक्रिया ‘किखा’ बारेमा जानकारी गराउने प्रयास गरिएको छ ।
प्राकृतिककरण भनेको कुनै देशको राष्ट्रियता नभएको व्यक्ति वा अरु विदेशी नागरिकलाई जापानको राष्ट्रियता प्रदान गर्ने प्रणाली हो । जापानमा प्राकृतिककरणका लागि अनुमति दिने न्याय मन्त्रीको अधिकार हो । न्याय मन्त्रीले प्राकृतिककरण गर्न अनुमति दिएमा आधिकारिक राजपत्रमा घोषणा गरिनुपर्दछ ।
क. जापानमा प्राकृतिकीकरणका लागि आवेदन गर्न निम्नलिखित आधारभुत मापदण्ड तोकिएको छ ।
१. बसाइ अवधिः प्राकृतिकीकरणका लागि आवेदन दिँदासम्म कम्तिमा पाँचवर्षसम्म जापानमा बसेको हुनुपर्दछ । ठेगाना कानूनी रुपमा हुनुपर्दछ त्यसैले निवासको स्थिति बैधानिक हुनुपर्दछ ।
२. उमेर हदः निवेदक १८ वर्ष वा सो भन्दा माथि उमेर भएको हुनुपर्दछ र आफ्नो देशको कानून अनुसार पनि वयस्क उमेर भएको हुनुपर्दछ ।
३. आचरणः असल आचरण भएको हुनुपर्छ । आपराधिक रेकर्ड भए-नभएको, कर तिरे-नतिरेको स्थिति, समाजमा अरुलाई दुख दिए-नदिएको अवस्था आदिलाई ध्यानमा राखेर व्यक्तिको आचरण राम्रो छ वा छैन भन्ने निर्धारण गरिन्छ ।
४. जीवनयापनः जापानमा जीवनयापनका लागि समस्या नपर्ने अवस्थाको हुनुपर्दछ । यो मापदण्ड एकै परिवारमा जीवनयापन गर्ने आफन्तहरूको आधारमा निर्णय गरिन्छ । त्यसैले आवेदकको आम्दानी नभए पनि अन्य नातेदारको सम्पत्ति वा सीपले उनीहरूलाई स्थिर जीवन बिताउन अनुमति दिएमा यो मापदण्ड पूरा भएको मानिने छ ।
५. दोहोरो नागारिकता सम्बन्धमाः जापानी नगारिक हुन चाहनेहरू या त राज्यविहीन हुनुपर्दछ वा सैद्धान्तिक रूपमा प्राकृतिककरणको माध्यमबाट आफ्नो अघिल्लो राष्ट्रियता त्याग्नुपर्ने हुन्छ । अपवादमा व्यक्तिको इच्छामा आफ्नो देशको राष्ट्रियता गुमाउन नसक्ने अवस्थामा यो मापदण्ड पूरा नभए पनि जापानी नागरिक हुन सकिन्छ ।
६. संवैधानिक प्रावधानः हिंसात्मक गतिविधिमा आबद्ध भएका, जापान सरकार विरुद्ध षड्यन्त्र या वकालत गर्ने ब्यक्ति वा संघसंस्थामा संलग्नता रहेका ब्यक्तिहरुले प्राकृतिककरणको अनुमति पाउन योग्य हुँदैनन् ।
७. जापानसंग विशेष सम्बन्ध भएका विदेशीहरू जस्तै जापानमा जन्मेका, जापानी नागरिकका पति/पत्नी, जापानी नागरिकका सन्तान, पूर्व जापानी नागरिक, आदिका लागि प्राकृतिककरण प्रक्रिया सहज हुन्छ । थप दैनिक जीवनमा समस्या नपर्ने गरी पर्याप्त जापानी भाषाको ज्ञान जस्तै ब्यवहारिक वार्तालाप, पढाई र लेखाईमा जानकार हुन आवश्यक छ ।
ख. प्राकृतिककरण अनुमतिका लागि आवेदन गर्ने तरिकाः
१. पन्ध्रवर्ष भन्दा कम उमेरको बच्चाको हकमा कानूनी प्रतिनिधिकारुपमा अभिभावक आफै गई लिखितरूपमा आवेदन दिनुपर्दछ । त्यसबेला प्राकृतिककरणका लागि आवश्यक मापदण्ड पूरा भएको प्रमाणित गर्ने कागजात संलग्न गर्नुपर्ने र प्राकृतिककरणको अनुमति प्राप्त भएमा पारिवारिक विवरण दर्ता गराउनुपर्ने हुन्छ । त्यसैले आवेदकको पहिचान गर्ने कागजातहरू पनि पेश गर्नुपर्दछ ।
२. आवेदन गर्ने निकायः आफु बस्ने स्थानबाट नजिकको कानूनी मामिला ब्यूरो (होउमुक्योकु) वा जिल्ला कानूनी मामिला ब्यूरो ।

ग. प्राकृतिककरण एप्लाई गर्दा आवश्यक पर्ने मुख्य कागजातहरू यसप्रकार छन् ।
१. फोटोसहितको निवेदन
२. परिवारका अन्य सदस्यहरुको विवरण भएको कागजात
३. प्राकृतिककरणका लागि प्रेरणा पत्र
४. रिरेकिस्यो (ब्यक्तिको बिस्तृत विवरण)
५. जीविकोपार्जनका लागि समस्या नहुने बिश्वास दिलाउने ब्यहोराको कागजात
६. व्यवसायको विवरण उल्लिखित कागजात
७. पारिवारिक विवरण प्रमाणपत्र (ज्युमिनहृयोउ)
८. राष्ट्रियता प्रमाणित गर्ने कागजात
९. नाता प्रमाणित गर्ने कागजात
१०. कर भुक्तानी गरेको प्रमाणित गर्ने कागजात
११. आय प्रमाणित गर्ने कागजात
सामान्य नियमको रूपमा राष्ट्रियता प्रमाणित गर्ने र व्यक्तिगत स्थिति प्रमाणित गर्ने कागजातहरू आफ्नो राष्ट्रको अधिकारीहरूले जारी गरेको प्रमाण पेश गर्नुपर्दछ । यसबाहेक आवेदकको राष्ट्रियता, उसको स्थिति र पेशाको आधारमा आवश्यक पर्ने कागजातहरु केहि भिन्न भिन्न पनि हुन सक्छन् । त्यसैले आवेदन गर्दा होमक्योउकुमा गई परामर्श गर्दा राम्रो हुन्छ ।

Resource Person: Ogawa Bunkei
Licensed tax accountant, Gyoseisyoshi Lawyer
Email: [email protected] or [email protected]
Tel: 03-6903-8817 Mob.070-4339-497

प्रकाशित मिति: शुक्रबार, भाद्र २२, २०८०

प्रकाशित समय: १०:५८:११