हेलो सेन्सेइ - (७०) एइज्युकेन एप्लाईका लागि आवश्यक योग्यता

टोकियो – जापानमा रहेका नेपालीहरुका लागि भिसा, यहाँको करप्रणाली, व्यवसायिक कारोवारको लेखा व्यवस्थापन र सो संग सम्बन्धित लाग्ने कर लगायतका विविध बिषयमा जानकारीमुलक स्तम्भ ‘हेलो सेन्सेइ !’ मा यसपटक हामी जापानमा स्थायी आवासीय अनुमति लिने प्रक्रिया अर्थात एइज्युकेन आवेदन गर्दा ध्यान दिनुपर्ने बिषयमा जापान इमिग्रेशनद्वारा निर्दिष्ट प्रावधान र तोकिएका मापदण्डका सम्बन्धमा थप प्रस्ट पार्ने जमर्को गरेका छौं ।

क. आवश्यक मापदण्डः
१. असल आचरण भएको, कानूनको पालना गर्दै आएको र आलोचित जीवन नभएको हुनुपर्ने ।
२. स्वतन्त्ररुपमा जीवन यापन गर्न पर्याप्त सम्पत्ति वा सीप भएको हुनुपर्ने, आफ्नो दैनिक जीवनमा कुनै बोझ बिना जीवन यापन गर्न सक्ने र सम्पत्ति वा सीपलाई हेरेर भविष्यमा स्थिर जीवन बिताउन सक्नेमा बिश्वस्त हुन सकिने आधार भएको हुनुपर्ने ।
३. एइज्यु भिसा प्राप्त गर्न चाहेको ब्यक्ति जापानको हितमा रहेकोमा बिश्वस्त हुन सकिने खालको हुनुपर्ने ।
४. सामान्यतयाः आवेदक कम्तिमा १० वर्ष जापानमा निरन्तर बसेको हुनुपर्दछ । यद्यपि, यस अवधि भित्र काम गर्न मिल्ने
गिनोउ जिस्युसेइ र तोकुतेइ गिनोउ-१ बाहेक अन्य काम गर्न पाउने भिसा भएको व्यक्तिको हकमा भने ५ वर्ष भन्दा बढी जापानमा बसेको हुनुपर्ने छ ।
५. जरिवाना वा कैदमा नपरेको हुनुका साथै सार्वजनिक दायित्वहरू जस्तै कर भुक्तानी, सार्वजनिक पेन्सन र सार्वजनिक चिकित्सा बिमा प्रिमियमको भुक्तानी र आप्रवासन नियन्त्रण र शरणार्थी मान्यता ऐन लगायतका तोकिएका दायित्वहरू उचित रूपमा पूरा गरिएको हुनुपर्ने छ ।
६. हाल रहेको भिसाको स्थितिमा आवेदक अध्यागमन नियन्त्रण र शरणार्थी मान्यता ऐनको प्रवर्तन नियमको बुँदा २ मा तोकिएको अनुसार सबैभन्दा लामो अवधिको भिसा भई जापानमा बसेको हुनुपर्छ ।
७. स्वास्थ्य स्थितिको हकमा संक्रामक तथा दीर्घरोगबाट ग्रसित नभएको हुनुपर्दछ ।
८. तथापी जापानी नागरिक, आवासीय भिसा वाहकको पति वा बच्चाको हकमा बुँदा (१) र (२) को पालना गर्न नपर्ने । शरणार्थीको रूपमा मान्यता प्राप्त व्यक्तिहरूको हकमा भने बुँदा (२) पालना गर्न नपर्ने ।

ख. सैद्धान्तिक रूपमा १० बर्ष जापान बस्ने विशेष प्रावधान
१. जापानी नागरिक, स्थायी बासिन्दा वा विशेष स्थायी बासिन्दाको जीवन साथीको हकमा वास्तविक जीवन विवाह गरेको ३ वर्ष वा सोभन्दा बढी भएको र १ वर्ष वा सोभन्दा बढी समय जापानमा बसेको हुनुपर्ने । उनिहरुको बच्चाको हकमा एक वर्षभन्दा बढी समय लगातार जापानमा बसेको हुनुपर्ने ।
२. तेइज्युस्याको हकमा लगातार ५ वर्षभन्दा बढी समय जापानमा बसेको हुनुपर्ने ।
३. यदि शरणार्थीको रूपमा मान्यता प्राप्तको हकमा मान्यता पाएपछि कम्तीमा पाँच वर्षम्म लगातार जापानमा बसेको हुनुपर्ने ।
४. जापानमा कूटनीति, समाज, अर्थतन्त्र, सँस्कृति आदि क्षेत्रमा योगदान पुराएको भनि मान्यता प्राप्त व्यक्तिहरू कम्तीमा पाँच वर्ष जापानमा बसोबास गरेको हुनुपर्ने ।
५. क्षेत्रीय पुनरुत्थान ऐनद्वारा मान्यता प्राप्त संस्थामा आबद्ध भई अध्यागमन नियन्त्रण ऐनले तोकेका गतिविधिमा संलग्न भएको र त्यस्ता गतिविधिमार्फत जापानमा योगदान गरेको मान्यता प्राप्त व्यक्तिको हकमा तीन वर्ष वा सोभन्दा बढी समय लगातार जापानमा बसेको हुनुपर्ने ।
६. अध्यागमन नियन्त्रण र शरणार्थी मान्यता ऐन अनुसार उच्चस्तरिय तथा दक्ष पेशेवरहरूको हकमा मापदण्डमा तोकिएका अंकहरू गणना गर्दा ७० वा बढी अंक प्राप्त गर्ने व्यक्ति निम्न मध्ये कुनै एकमा पर्छ भने –
क. उच्चस्तरिय दक्ष विदेशी जनशक्तिको रूपमा लगातार ३ वर्ष भन्दा बढी समय देखि जापान मा बसोबास गरेको हुनुपर्ने छ ।
ख. लगातार ३ वर्ष वा सोभन्दा बढी समयदेखि जापानमा बसोबास गरिरहेको र स्थायी बसोबासको लागि अनुमति आवेदन दिएको मिति भन्दा ३ वर्षअघिको समयको आधारमा उच्च दक्ष पेशागत अध्यादेशमा तोकिएको अंक गणना गर्दा ७० अंक वा सोभन्दा बढी अंक भएको मानिनुपर्ने छ ।

७. मापदण्डअनुसार हिसाब गर्दा ८० वा सोभन्दा बढी अंक प्राप्त गर्ने व्यक्ति वा निम्न मध्ये कुनै एकमा पर्ने व्यक्ति ।
क. उच्च-दक्ष विदेशी पेशागतको रूपमा लगातार एक वर्षभन्दा बढी जापानमा बसोबास गरेको हुनुपर्ने
ख. एक वर्ष वा सोभन्दा बढी समयदेखि निरन्तर जापानमा बसोबास गरेको र एइज्यु अनुमतिको आवेदन मितिभन्दा एकवर्ष अघिको आधारमा उच्च दक्ष पेशासम्बन्धी मन्त्रालयको अध्यादेशमा तोकिएको अंक हिसाब गर्दा ८० अंक वा सोभन्दा बढी अंक प्राप्त गरेको व्यक्तिको रूपमा मान्यता प्राप्त भएको हुनुपर्ने
८. विशेष दक्ष पेशासम्बन्धी मन्त्रीस्तरीय अध्यादेशमा तोकिएको मापदण्ड र निम्न मध्ये कुनै पनि मापदण्ड अन्तर्गत पर्ने व्यक्तिः
क. विशेषप्रकारको दक्ष जनशक्तिको हकमा जापानमा एकवर्ष भन्दा बढी समयदेखि निरन्तर बस्दै आएको हुनुपर्ने छ ।
ख. एकवर्ष वा सोभन्दा बढी समयदेखि निरन्तर जापानमा बसोबास गरेको र एइज्यु अनुमतिको आवेदन मितिभन्दा एक वर्षअघिको आधारमा विशेष दक्ष जनशक्तिकारुपमा तोकिएको मापदण्ड पुरा भई मान्यता प्राप्त भएको हुनुपर्ने छ ।
९. हालका लागि माथिका १ को ३ को ग अनुसार यदि कुनै व्यक्तिको तीनवर्ष बसाइको अवधि छ भने लामो अवधिको बसाई अबधि भएको मानिने छ ।
१०. यसैगरी माथिको २ को (६) क उच्च दक्ष विदेशी पेशेवर भन्नाले जापानमा बसोबास गर्ने व्यक्तिहरूलाई बुझाउँछ । जसलाई अंक हिसाब अनुसार ७० अंक वा सोभन्दा बढी अंक प्राप्त भएको मानिन्छ र माथि २ को ७ क अनुसार उच्च दक्ष विदेशी पेशेवर भन्नाले अंक हिसाब परिणाम स्वरूप ८० अंक वा सोभन्दा बढी अंक प्राप्त गरेको र जापानमा बसोबास गर्ने व्यक्ति भन्ने बुझाउँदछ । माथि उल्लिखित २ को ८ को क को उच्च दक्ष विदेशी पेशेवरहरू भन्नाले विशेष दक्ष पेशासम्बन्धी मन्त्रीस्तरीय अध्यादेशमा तोकिएको मापदण्ड पूरा गरेको मानिन्छ ।***

Resource Person: Ogawa Bunkei
Licensed tax accountant, Gyoseisyoshi Lawyer
Email: [email protected] or [email protected]
Tel: 03-6903-8817 Mob.070-4339-497

प्रकाशित मिति: शनिबार, भाद्र ०९, २०८०

प्रकाशित समय: १०:०८:५५