हेलो सेन्सेइ - (५८) वर्किङ भिसाका लागि आधारभुत योग्यता

टोकियो – जापानमा रहेका नेपालीहरुका लागि भिसा, यहाँको करप्रणाली, व्यवसायिक कारोवारको लेखा व्यवस्थापन र सो संग सम्बन्धित लाग्ने कर लगायतका बिषयमा जानकारी होस् भन्ने उद्देश्यले सुरु गरिएको स्तम्भ ‘हेलो सेन्सेइ !’ मा यसपटक हामी बिदेशी नागारिकले जापानको होटलहरुमा वा अन्य कम्पनीमा स्याइनकोरुपमा काम गर्नुपरेमा कस्तो अवस्थामा भिसा प्राप्त हुने गरेको छ र कस्तो अवस्थामा रिजेक्ट हुने गरेको छ भन्ने बारेमा प्रकाश पार्ने जमर्को गरिएको छ ।
जापानको होटल वा र्‍योउखानमा विदेशी नागरिकले कर्मचारीको रूपमा काम गर्नका लागि ‘इञ्जिनियर, मानविकी, अन्तर्राष्ट्रिय सेवा विशेषज्ञ’ -Gijutsu Jinbun Chishiki Kokusai Gyōmu_ क्याटगोरीको भिसा आवश्यक हुन्छ । उसो त स्थायी बसोबास भिसा, दीर्घकालिन निवास भिसा र जापानी स्पाउज भिसा भएकाहरूले त यो काम गर्न पाउने नै भए । होटल वा रेस्टुरेन्टको हलमा काम गर्न, बेड मेकिङ गर्न अध्यागमनले प्रदान गरेको भिसाको स्थिति अन्तर्गत काम गर्ने अनुमति (सिखाकुगाइ खाचुदोउ) प्राप्त गरी काम गर्न सकिन्छ ।
जापानको होटल वा र्‍योखानमा स्थायी कर्मचारीको रूपमा काम गर्दा आवश्यक पर्ने ‘इञ्जिनियर, मानविकी, अन्तर्राष्ट्रिय सेवा विशेषज्ञ’ क्याटगोरीको भिसा प्राप्त गर्न केहि खास प्रावधानहरु तोकिएका छन् ।
१. विश्वविद्यालय वा व्यावसायिक विद्यालयबाट स्नातक तह वा १० वर्ष भन्दा बढी कामको अनुभव भएको हुनुपर्ने ।
२. जापानमा काम गर्न चाहेको क्षेत्रको सीप र ज्ञानको बारेमा जापान, नेपाल वा अन्य कुनै देशको विश्वविद्यालय तहको अध्ययन र स्नातक गरेको हुनुपर्ने । व्यवसायिक अध्ययनका अतिरिक्त विश्वविद्यालयमा अन्य विषयहरुको अध्ययन गरिरहनु भएको छ भने अध्ययन गरिरहेको बिषय र अबबाट गर्न गईरहेको कामको प्रकृति थोरै फरक छ भने पनि इमिग्रेशन नियमअनुसार सदर हुने उल्लेख छ ।
३. जापानमा काम गर्न चाहेको क्षेत्रको सीप र ज्ञानको बारेमा अध्ययन गरी जापानी व्यवसायिक विद्यालयबाट स्नातक गरेको हुनुपर्ने । तर विदेशस्थित व्यवसायिक विद्यालयहरूलाई भने मान्यता दिइएको छैन ।
४. कार्यक्षेत्रमा १० वर्षभन्दा बढीको अनुभव हुनुपर्ने । नेपाल वा अन्य देशहरूमा काम गरेको अनुभव र हाईस्कुल, विश्वविद्यालय वा व्यवसायिक विद्यालयमा सम्बन्धित बिषयमा अध्ययन गरेको अनुभवको प्रमाणपत्र पेश गर्नुपर्दछ ।
५. जापानमा अब गर्न लागेको कामको प्रकृति विदेशी सँस्कृतिमा आधारित छ भने त्यसमा आधारित ३ वर्षभन्दा बढीको अनुभव भएको हुनुपर्ने । जस्तै, अनुवादक भाषाहरू सिकाउने, प्रचार, विदेशी व्यापार, कपडा र कोठाहरू डिजाइन गर्ने र नयाँ उत्पादनहरूको लागि आइडिया सिर्जना गर्ने ।
विश्वविद्यालयबाट स्नातक गरेका व्यक्तिले अनुवाद, अनुवादक, भाषाहरू सिकाउने काम गर्न चाहेमा ३ वर्षको अनुभव आवश्यक पर्दैन । किनभने विदेशी सँस्कृतिमा आधारित काम भएकाले यो साधारण जापानीहरूका लागि गाह्रो काम हो ।
६. भविष्यमा गर्न लाग्नुभएको कामको सम्झौता जापानी नागरिक सरह तलब सुबिधा प्राप्त गर्न सक्ने हुनुपर्ने । होटल वा र्‍योउखानमा काम गर्ने प्रयोजनका लागि ‘इञ्जिनियर, मानविकी, अन्तर्राष्ट्रिय सेवा विशेषज्ञ’ क्याटगोरीको भिसा दिने वा नदिने भन्ने बारेमा सबै कागजात छानबिन गरेपछि इमिग्रेशनले अन्तिम निर्णय दिने छ ।

निम्न अवस्थामा भिसा दिने गरेको पाईएको
क. जापानी विश्वविद्यालयबाट पर्यटन बिषयमा स्नातक गरी धेरै विदेशी पर्यटकहरू आउने होटेलमा मासिक २ लाख २० हजार येन बराबर तलबमा काम गर्ने गरेको, कामको सिलसिलामा विदेशी भाषा प्रयोग गरी फ्रन्ट डेस्कमा र होटलको बारेमा जानकारी गराउने काम गर्ने गरेको
ख. जापानी विश्वविद्यालयबाट स्नातक गरेको धेरै जापानी पर्यटकहरू आउने र्‍योउखानमा, मासिक २ लाख येन बराबर तलब पाउने गरेको र होटेलका कर्मचारीहरूलाई विदेशी भाषाहरू सिकाउने, ट्राभल एजेन्सीहरूसंग भेटघाट गर्दा अनुवादकको काम गर्ने गरेको
ग. जापानी विश्वविद्यालयबाट अर्थशास्त्र अध्ययन गरी स्नातक गरेको विमानस्थल नजिकैको होटलमा मासिक २ लाख ५० हजार येन बराबर तलब पाउने गरेको, ब्यवसायिक मार्केटिङ र विदेशी पर्यटकका लागि वेभसाइट बनाउने लगायतका काम गर्ने गरेको
घ. जापानी भाषा पढेर व्यवसायिक कलेजबाट स्नातक गरेको व्यक्तिले धेरै विदेशी पर्यटकहरू आउने र्‍योउखानमा मासिक २ लाख येन बराबर तलबमा पाउने र विदेशी भाषा प्रयोग गरी फ्रन्ट डेस्क र विदेशी पर्यटकहरुको लागि वेबसाइटहरू बनाउने काम गर्ने गरेको

निम्न अवस्थामा भिसा रिजेक्ट हुने गरेको पाईएको
क. जापानी विश्वविद्यालयबाट अर्थशास्त्र बिषयमा स्नातक गरेको ब्यक्तिले होटलमा जागिरको प्रस्ताव प्राप्त गरी भिसाको लागि आवेदन दिदा होटलले कामको प्रकृतिबारे दिएको जानकारीमा ग्राहकको सामान बोक्ने, होटेलको कोठा सफा गर्ने र होटेलको रेस्टुरेन्टको हलमा काम गर्ने उल्लेख भएकोमा भिसा रिजेक्ट भएको । यसप्रकारको कामका लागि भिसाको क्याटगोरी ‘इञ्जिनियर, मानविकी, अन्तर्राष्ट्रिय सेवा विशेषज्ञ’ होईन ।
ख. जापानी विश्वविद्यालयबाट जापानी भाषा मुख्य बिषयमा स्नातक गरेका एक व्यक्तिले र्‍योउखानमा आउने विदेशीहरूका लागि अनुवादकको काम गर्ने भनि भिसा आवेदन दिएकोमा र्‍योउखानमा आउने विदेशीहरू पर्यटकका लागि उक्त ब्यक्तिले अध्ययन गरेको बिषय जापानी भाषा मेल नखाएकोले भिसा रिजेक्ट भएको ।
ग. जापानको विश्वविद्यालयबाट कानून बिषयमा स्नातक व्यक्तिले मासिक तलब १५ मान येन पाउनेगरी र्‍योउखानको फ्रन्ट डेस्कमा विदेशी भाषा प्रयोग गर्ने र होटलका ग्राहकलाई गाइड गर्ने गरी भिसा आवेदन गरेकोमा होटलमा सोधपुछ गर्दा एकै समयमा भर्ना भएका र एउटै काम गर्ने जापानी नागरिकको मासिक तलब २० मान येन भएको थाहा पाई तलब किन फरक पारेको भन्ने स्पस्ट कारण नखुलेकोले भिसा रिजेक्ट भएको घटना पनि छ । एउटै प्रकृतिको काम गर्ने र एकै समयमा भर्ना भएका विदेशी कर्मचारीको पनि जापानी नागरिक सरह तलब हुनुपर्दछ ।
घ. जापानी व्यवसायिक विद्यालयमा डिजाइनमा स्नातक गरेको र्‍योउखानको फ्रन्ट डेस्कमा रिसेप्शनिस्टको काम गर्न भनि भिसा आवेदन दिएकोमा कामको प्रकृतिसंग अध्ययन गरेको बिषय मेल नखाएको कारण भिसा नदिएको घटना पछि छ ।
ङ. भोकेशनल कलेजबाट होटल सेवा र व्यवसायमा स्नातक गरेका एक व्यक्तिले होटेलको फ्रन्ट डेस्कमा काम गर्न भिसा आवेदन गरेकोमा होटेलले पेश गरेको कागजातमा उनी कम्पनीमा आबद्ध भएको पहिलो दुई बर्ष तालिमका रूपमा रेष्टुरेन्टको हलको काम र कोठामा ओछ्यान बनाउने काम गरेको लेखिएको हुनाले भिसा रिजेक्ट भएको घटना छ । फ्रन्ट डेस्क बाहेक अन्य कामका लागि प्रशिक्षण समय धेरै लामो भएकोले यस किसिमको कामका लागि ‘इञ्जिनियर, मानविकी, अन्तर्राष्ट्रिय सेवा विशेषज्ञ’ क्याटगोरीको भिसा नदिएको घटना पनि छ । त्यसकारण इमिग्रेशनमा आफ्नो भिसा आवेदन गर्दा आवेदन गर्नु अघि आफ्नो कामको प्रकृति र तलब विवरण राम्रोसंग चेकजाँच गरी आबेदन गर्नुपर्दछ । ***

यो पनि पढ्नुहोस् :

Resource Person: Ogawa Bunkei
Translated by: Bishnu Tiwari
Licensed tax accountant, Gyoseisyoshi Lawyer
Email: ogawa@saitama-kaikei.net or samudra@samudrapari.com
Tel: 03-6903-8817 Mob.070-4339-497