हेलो सेन्सेइ - (७२) यस्तो छ, अक्टुबरदेखि लागू भएको नयाँ नियम

टोकियो – जापानमा रहेका नेपालीहरुका लागि भिसा, यहाँको करप्रणाली, व्यवसायिक कारोवारको लेखा व्यवस्थापन र सो संग सम्बन्धित लाग्ने कर लगायतका विविध बिषयमा जानकारीमुलक स्तम्भ ‘हेलो सेन्सेइ !’ मा यसपटक हामी यो वर्षको अक्टुबर महिनाको १ तारिखबाट जापानमा लागू भएको केही नयाँ नियमहरुका बारेमा जानकारी गराउने प्रयास गरिएको छ ।

१. न्युनतम ज्याला : जापान सरकारले यो वर्षको अक्टुबर महिनाको १ तारिखबाट लागू हुनेगरी श्रमिकहरुको न्युनतम पारिश्रमिक प्रतिघण्टा ३९ येन बाट बढाएर ४७ येनसम्म पुर्‍याएको छ । जसअनुसार टोकियो तोको न्युनतम पारिश्रमिक १ हजार ७२ येनबाट बढेर १ हजार १ सय १३ येन हुने भएको छ । यसैगरी अन्य प्रिफेक्चरहरुमा पनि प्रतिघण्टाको पारिश्रमिक रकम देहायअनुसार परिवर्तन भएको छ ।
होक्काइदो ९६० येन
आओमोरी ८९८ येन
मियागी ९२३ येन
इबाराकी ९५३ येन
तोचिगी ९५४ येन
गुन्मा ९३५ येन
कानागावा १११२ येन
साइतामा १०२८ येन
चिबा १०२६ येन
यामानासी ९३८ येन
शिजुओका ९८४ येन
आइची १०२७ येन
ओसाका १०६४ येन
हृयोगो १००१ येन
ओकायामा ९३२ येन
हिरोसिमा ९७० येन
फुकुओका ९४१ येन
ओकिनावा ८९६ येन
यसबाहेक अन्य क्षेत्रको पनि प्रतिघण्टा पारिश्रमिक दर बढेको छ । जापान सरकारले जापानमा काम गर्ने श्रमिकको हितलाई ध्यानमा राखेर न्युनतम तलवमान निर्धारण गरेको हो र सोही अनुसार जापानमा कानूनी ब्यवस्था गरिएको हुन्छ । त्यसैले निर्धारित न्युनतम पारिश्रमिक भन्दा कम तलब भुक्तानी अवैध मानिन्छ । रोजगारदाता कम्पनीसंग रोजगारी सम्बन्धित करारनामा गर्दा निर्धारित तलबमान अनुसार मेल नखाएमा मान्य हुँदैन । इमिग्रेशन वा हेलो वर्कको रोउदोउ क्योकुमा कुनै कागजात बुझाउनुपर्दा न्युनतम तलबमान मिले नमिलेको राम्रोसंग चेकजाँच गर्नुपर्दछ ।
२. नयाँ इन्भोइस सिष्टम : अक्टोबर १ देखि जापानमा उपभोग कर (स्योहिजेइ) संग सम्बन्धित नयाँ इन्भोइस सिष्टम सुरु हुने भएको छ । इन्भोइस सिस्टम भन्नाले कुनै कम्पनी वा कोउजिन जिग्योउ (व्यक्तिगत ब्यवसाय) उपभोग करको हिसाब गर्दा कर कार्यालयमा दर्ता भएको स्योहिजेइ इन्भोइस सिस्टम नम्बर भएका रसिदहरूलाई मात्र मान्यता दिईने सिस्टम हो ।
इन्भोइस नम्बर दर्ता गरिसके पछि सेइक्यूस्यो र र्‍योउस्युस्यो (नगदी भरपाई) मा कम्पनी वा व्यक्तिगत ब्यवसायको इन्भोइस नम्बर लेख्नुपर्दछ । ८ प्रतिशत र १० प्रतिशत स्योहिजेइ पनि सेइक्युस्यो र र्‍योउस्युस्योमा छुट्टाएर लेख्नुपर्दछ । यसका साथै र्‍योउस्युस्योमा सेवाग्राही (व्यक्ति वा कम्पनी) को नाम, मिति, जम्मा रकम र कुन प्रयोजनका लागि हो त्यसको संक्षिप्त विवरण अनिवार्य लेख्नुपर्दछ । यसैगरी र्‍योउस्युस्योमा जारी गर्ने कम्पनीको नाम र इन्भोइस दर्ता नम्बर, उपभोक्ता कर ८ प्रतिशत हो वा १० प्रतिशत सोहि अनुसारको रकम लेख्नुपर्दछ ।
यसैगरी ५ मान येन भन्दा बढि रकमको र्‍योउस्युस्योमा २ सय येनको टिकट टाँस्नुपर्दछ । रेस्टुरेन्ट र पर्सनल कष्टमरलाई बेच्ने हलाल फुड पसलको हकमा र्‍योउस्युस्योमा भने व्यक्ति र कम्पनीको नाम नलेखी दिदा पनि मान्य हुन्छ । तथापी पसलमा बेच्ने होलसेल पसलको कम्पनीले भने र्‍योउस्युस्यो दिंदा प्राप्त गर्ने कम्पनीको नाम अनिवार्य लेख्नुपर्दछ । सेइक्युस्योको हकमा पनि सोही अनुसार विवरण उल्लेख गर्नुपर्दछ । र्‍योउस्युस्यो र सेइक्यूस्यो जापानको कानून अनुसार ७ वर्षसम्म सुरक्षित राख्नुपर्दछ ।

Resource Person: Ogawa Bunkei
Licensed tax accountant, Gyoseisyoshi Lawyer
Email: [email protected] or [email protected]
Tel: 03-6903-8817 Mob.070-4339-497

प्रकाशित मिति: शनिबार, कार्तिक ०४, २०८०

प्रकाशित समय: २२:३९:०८