हेलो सेन्सेइ - (६४) डिपेन्डेन्टबाट वर्किङ भिसा परिवर्तन गर्दा ........

टोकियो – जापानमा रहेका नेपालीहरुका लागि भिसा, यहाँको करप्रणाली, व्यवसायिक कारोवारको लेखा व्यवस्थापन र सो संग सम्बन्धित लाग्ने कर लगायतका बिषयमा जानकारी होस् भन्ने उद्देश्यले सुरु गरिएको स्तम्भ ‘हेलो सेन्सेइ !’ मा यसपटक हामी डिपेन्डेन्ट भिसामा भएका ब्यक्तिले जापानको हाइस्कुल तहको शिक्षा उत्तीर्ण गरिसकेपछि वर्किङ भिसा परिवर्तन गर्न सकिने विद्यमान प्रावधानहरुका बारेमा जानकारी गराउने प्रयास गरिएको छ ।

डिपेन्डेन्ट भिसा भएको व्यक्तिले जापानको माद्यामिक तहको शिक्षा उत्तीर्ण गरिसकेपछि वा विश्वविद्यालय तह वा व्यवसायिक विद्यालयको निश्चित कोर्स उत्तीर्ण गरेपछि जापानमा पूर्णकालिन काम गर्न वर्किङ भिसा लिन सकिन्छ । यो क्याटगोरीको भिसालाई इञ्जिनियर/मानविकी/अन्तर्राष्ट्रिय ब्यवस्थापन भिसा भनिन्छ । यसैगरी विश्वविद्यालय वा व्यवसायिक विद्यालय उत्तीर्ण नगरेको भए पनि तेइज्यु (दीर्घकालीन आवासीय) भिसा वा तोकुतेइ (विशेष गतिविधि) भिसामा परिवर्तन गरी जापानमा काम गर्न पाईन्छ । जापान इमिग्रेशनका अनुसार यस सम्बन्धमा ब्यवस्था गरिएको प्रावधान यस प्रकारको छ ।
१. इञ्जिनियर/मानविकी/अन्तर्राष्ट्रिय ब्यवस्थापन क्याटगोरीको भिसामा परिवर्तन गर्दा विश्वविद्यालय वा व्यवसायिक विद्यालय तह उत्तीर्ण गरेपछि वा स्नातक गरिने निश्चित भएमा जापानमा रोजगारदाता कम्पनीबाट उक्त भिसामा मेल खाने नाइतेइ (रोजगार प्रस्ताव) र रोजगार सम्झौता आदि प्राप्त गरेको बेलामा त्यो कम्पनी र कामको प्रकृतिका बारेमा अध्यागमन कार्यालयबाट अनुमति प्राप्त भएमा यो भिसा परिवर्तन गर्न सकिन्छ । इमिग्रेशनद्वारा निश्चित कामका लागि यो भिसा निर्धारण गरिएको हुन्छ । त्यसैले यो क्याटगोरीको भिसाका लागि मेल खाने प्रकृतिको कामहरू मात्र गर्न पाइन्छ ।
२. तेइज्यु (दीर्घकालीन आवासीय) भिसामा परिवर्तन गर्दा : जापानको प्राथमिक विद्यालय र निम्नमाद्यामिक विद्यालय तह उत्तीर्ण गरेको छ भने यो भिसामा परिवर्तन गर्न सकिन्छ । यदि तेइज्यु भिसामा परिवर्तन गर्न सकियो भने जापानको नियम भित्र रहेर कुनै पनि काम गर्न पाईन्छ ।

आवश्यक योग्यता :
क. जापानको प्राथमिक तह र निम्न माद्यामिक तह दुवै तह उत्तीर्ण भएको हुनुपर्ने ।
ख. विश्वविद्यालयबाट स्नातक वा स्नातक गर्न निश्चित भएको हुनुपर्ने ।
ग. १८ वर्षको उमेर अघि जापान प्रवेश गरेको हुनुपर्ने ।
घ. रोजगारदाता कम्पनीबाट प्रस्ताव स्वीकृत गरी रोजगार सम्झौता प्राप्त गरेको हुनुपर्ने ।

आवश्यक कागजातहरू :
क. निवासको स्थिति परिवर्तनको लागि आवेदन फर्म
ख. प्राथमिक र निम्न माद्यामिक तह उत्तीर्ण गरेको विवरण सहितको रिरेकिस्यो
ग. प्राथमिक र निम्न माद्यमिक तह उत्तीर्ण गरेको प्रमाणपत्र
घ. जापानको माद्यामिक तह उत्तीर्ण गरेको प्रमाणपत्र वा स्नातक अध्ययन गर्न निश्चित भएको पुष्टि गर्ने कागजात
ङ. ग्यारेन्टी पत्र (Mimoto Hoshosho)
च. रोजगारदाता कम्पनीको रोजगार सम्झौता, प्रस्ताव पत्र इत्यादि
छ. ज्युमिनहृयो (आवासीय स्थितिको प्रमाणपत्र)
३. तोकुतेइ भिसा (विशिष्ट गतिविधि) मा परिवर्तन गर्नुपरेमा : जापानको प्राथमिक विद्यालय तह उत्तीर्ण नभएता पनि डिपेन्डेन्ट भिसामा रहेका ब्यक्तिले यो भिसामा परिवर्तन गर्न सक्ने ब्यवस्था छ । यदि यो तोकुतेइ भिसामा परिवर्तन भयो भने जापानमा काम गर्न अनुमति पाईन्छ । यद्यपी पाचिङको, पार्लर, बार, क्लब वा यौनजन्य गतिविधिमा भने काम गर्न भने अनुमति छैन ।

आवश्यक योग्यताः
क. माद्यामिक तह उत्तीर्ण गरेको प्रमाणपत्र वा स्नातक तह अध्ययनको निश्चित भएको पुष्टि गर्ने प्रमाणित कागजात भएको हुनुपर्ने
ख. १८ वर्षको उमेर अघि जापान प्रवेश गरेको हुनुपर्ने
ग. रोजगारदाता कम्पनीद्वारा प्रस्ताव स्वीकृत भई रोजगार सम्झौता प्राप्त गरेको हुनुपर्ने
घ. ग्यारेन्टरका रुपमा अभिभावक जापानमै भएको हुनुपर्ने
ङ. यदि जापानको माद्यामिक तहको अध्ययन बीचबाट प्रवेश भएको हो भने जापानी भाषाको लेभल ‘N2’ वा सो सरहको हुनुपर्ने

आवश्यक कागजातहरू :
क. निवासको स्थिति परिवर्तनको आवेदन
ख. माद्यामिक तह अध्ययनका लागि प्रवेश गरेको मिति उल्लेख सहितको रिरेकिस्यो
ग. अध्ययनरत विद्यालयको प्रमाणपत्र
घ. माद्यामिक तह उत्तीर्ण गरेको प्रमाणपत्र वा स्नातक अध्ययन निश्चित भएको पुष्टि गर्ने प्रमाणित कागजात
ङ. अभिभावकको ग्यारेन्टी पत्र
च. रोजगारदाता कम्पनीद्वारा प्रस्ताव स्वीकृत गरिएको ब्यहोराको पत्र र रोजगार सम्झौता पत्र
छ. ज्युमिनहृयो
ज. जापानी भाषा परीक्षाको ‘N2’ वा सो सरह भन्दा माथिको लेभल उत्तीर्ण गरेको प्रमाणपत्र वा BJT जापानी भाषा परीक्षामा चार सय अंक वा सोभन्दा बढी अंक प्राप्त गरेको प्रमाणपत्र
माद्यामिक तहको शिक्षा उत्तीर्ण गरिसकेपछि डिपेन्डेन्ट भिसाबाट वर्किङ भिसामा परिवर्तन गर्दा करीव २, ३ महिना समय लाग्न सक्छ । त्यसैले भिसाको लागि आवेदन गरिसकेपछि कम्पनीको काम सुरु गर्न सकिन्छ । यदि डिपेन्डेन्ट भिसामै रहेर पार्ट-टाइम काम गर्ने भएमा इमिग्रेशनबाट काम गर्ने अनुमति प्राप्त गरी हप्तामा अधिकतम २८ घण्टासम्म काम गर्न सकिन्छ ।

Resource Person: Ogawa Bunkei
Translated by: Bishnu Tiwari
Licensed tax accountant, Gyoseisyoshi Lawyer
Email: [email protected] or [email protected]
Tel: 03-6903-8817 Mob.070-4339-497

प्रकाशित मिति: शुक्रबार, बैशाख २२, २०८०

प्रकाशित समय: ११:०२:४७