समाचार सुन्नुहोस :
काठमाडौँ – एफवान सफ्टको बैंक खाता ह्याक गरी करोडौँ रुपैयाँ चोरी भएको छ। अनलाइन बैंकिङ प्रणाली ह्याक गरेर ह्याकरले तीन करोड ४२ लाख रुपैयाँ सिटिजन्स बैंकको खाताबाट चोरी गरेको खुलासा भएको छ।
अनुसन्धान अनुसार, ह्याकरहरूले कम्पनीको खातामा रहेको रकम विभिन्न समयमा नेपाली बैंक खातामा ट्रान्सफर गरेका थिए। प्रहरीले यो रकम वैदेशिक रोजगारीका व्यक्तिसँग हुण्डी कारोबार मिलाउन प्रयोग भएको आशंका गरेको छ।
यो घटनामा विदेशी गिरोहको संलग्नता रहेको अनुमान गरिएको छ। प्रहरीको साइबर ब्युरोले अहिले घटनाको अनुसन्धान जारी राखेको छ। तर, बैंक खाता कसरी ह्याक भयो भन्ने विषयमा भने अझै जानकारी प्राप्त नभएको जनाएको छ।
एफवान सफ्ट फिनटेक प्रविधिमा आधारित एक प्रतिष्ठित कम्पनी हो। यसले ईसेवा र फोन पेजस्ता डिजिटल वालेटका साथै विभिन्न बैंकहरूको इन्टरनेट र मोबाइल बैंकिङ प्रणालीको विकास र व्यवस्थापनको काम गर्दै आएको छ।
