समाचार सुन्नुहोस :
काठमाडौँ – काठमाडौं महानगरपालिकाले त्रिपुरेश्वरस्थित भाटभटेनी सुपरमार्केटलाई २ लाख रुपैयाँ जरिवाना गरेको छ। ढुसी लागेको सामग्री बेचेको पाइएपछि महानगरपालिकाको कृषि तथा पशुपंक्षी विभागले भाटभटेनी सुपर मार्केटलाई यो जरिवाना गरेको हो।
महानगरको कृषि तथा पशुपंक्षी विभागले प्राप्त गुनासोका आधारमा अनुगमन गरेको थियो। “बासी, सडेगलेका र किरा लागेको खाना बिक्री भयो” भन्ने उजुरीपछि गरिएको निरीक्षणमा, नरिवलका ४४ प्याकेटमा ढुसी फेला परेका थिए। अनुगमनपछि ती सामग्रीलाई नष्ट गरिएको र जरिवानाको प्रक्रिया अपनाइएको थियो।
महानगरले जारी गरेको विज्ञप्तिमा भाटभटेनीलाई आगामी दिनमा प्रचलित कानुनको पालनासहित मात्र उच्च गुणस्तरका खाद्य सामग्री बिक्री गर्न निर्देशन दिइएको छ। जरिवानाको रकम महानगरको राजस्व खातामा जम्मा गरिएको र भविष्यमा यस्ता त्रुटि दोहोरिन नदिन सतर्कता अपनाउन भनिएको छ।
