हेलो सेन्सेइ - (६०) विद्यार्थी भिसाबाट वर्किङ भिसा परिवर्तन गर्दा ....

टोकियो – जापानमा रहेका नेपालीहरुका लागि भिसा, यहाँको करप्रणाली, व्यवसायिक कारोवारको लेखा व्यवस्थापन र सो संग सम्बन्धित लाग्ने कर लगायतका बिषयमा जानकारी होस् भन्ने उद्देश्यले सुरु गरिएको स्तम्भ ‘हेलो सेन्सेइ !’ मा यसपटक हामी विद्यार्थी भिसाबाट वर्किङ भिसा – इञ्जिनियर/मानविकी/अन्तर्राष्ट्रिय सेवा विशेषज्ञ (Gijutsu Jinbun Chishiki Kokusai Gyōmu) परिवर्तन गर्ने सिलसिलामा इमिग्रेशनद्वारा स्वीकृत भएका र अस्वीकृत भएका केही प्रतिनिधिमुलक घटनाहरूको बारेमा जानकारी गराउने प्रयास गरिएको छ ।

विश्वविद्यालय वा व्यवसायिक कलेजबाट स्नातक प्राप्त गरेकाहरु कम्पनीमा जागीर पाउन सक्षम भए पनि वर्किङ भिसाको ग्यारेन्टी भने हुँदैन । जापानमा काम गर्नका लागि वर्किङ भिसा सम्बन्धि आफ्नै नियमहरू छन् त्यसैले ती नियमहरू पूरा गर्न सकिएन भने भिसा प्राप्त गर्न सकिंदैन ।

जापानी विश्वविद्यालयबाट स्नातक उत्तीर्णको हकमा स्वीकृत घटना –
क. व्यवसाय प्रशासन संकायबाट (केइएइ गाकुबु) मा स्नातक गरेकाहरूले कम्प्युटर सेवा कम्पनीमा अनुवादन र अनुवादकको रूपमा काम गर्न ।
ख. कानून संकायबाट स्नातक गरेका व्यक्तिहरुले वकिल अफिसमा वकिलको सपोर्टका लागि काम गर्न
ग. शिक्षा संकायबाट स्नातक गरेका व्यक्तिले विदेशी भाषाहरू सिकाउने कम्पनीमा अंग्रेजी शिक्षकको रूपमा काम गर्न
घ. अर्थशास्त्र संकायबाट स्नातक गरेको व्यक्ति सफ्टवेयर विकास कम्पनीमा सिस्टम इञ्जिनियरको रूपमा काम गर्न

अस्वीकृत घटनाहरु –
क. अर्थशास्त्र संकायबाट स्नातक गरेका व्यक्तिले कर अडिटर (जेइरिशी) कार्यालयमा जागिरका लागि अवसर प्राप्त गरी भिसा आबेदन गरिएकोमा इमिग्रेशनबाट छानबिन हुँदा जेइरिशी अफिसको ठेगानामा अफिस नभई रेस्टुरेन्ट रहेको भेटिएको । त्यसपछि इमिग्रेशनले घटनाका बारेमा सोधिएको प्रश्नमा चित्तबुझदो जबाफ नपाएकोले अनुमति अस्वीकृति गरिएको ।
ख. शिक्षा संकायबाट स्नातक गरेको व्यक्तिले बेन्तो बनाउने कारखानामा बेन्तो प्याक गर्ने कामका लागि आवेदन दिएको र यो काम इञ्जिनियर/मानविकी/अन्तर्राष्ट्रिय सेवा विशेषज्ञ भिसाले दिमागी ज्ञान प्रयोग गर्ने काम नभएको ठहर गरी आबेदन अस्वीकृत गरिएको ।
ग. मेकानिकल इञ्जिनियरिङबाट स्नातक गरेका व्यक्तिले कम्प्युटर सेवा प्रदान गर्ने कम्पनीमा सिस्टम इञ्जिनियरको काम गर्नका लागि आवेदन दिएको र मासिक तलब १ लाख ४० हजार मात्र येन रहेको तर एकै समयमा कम्पनीको काम सुरु गरेका जापानीको तलब भने १८ लाख येन थियो । अन्य जापानी व्यक्तिको जस्तै समान तलब दिने सम्झौता नभएकोले एउटै काम गर्ने व्यक्तिहरुको किन फरक तलब र बिदेशी कर्मचारीको लागि पनि जापानी कर्मचारीको बराबर सम्झौता नभएको भन्ने कारण देखाई आबेदन रद्ध गरिएको ।
घ. व्यवसाय प्रशासन संकायबाट स्नातक गरेको व्यक्तिले विदेशी व्यापारको (बोउएकी) कम्पनीमा जागीर गर्ने भनि आवेदन दिएकोमा व्यवसाय प्रशासन संकायको बिद्यार्थी भएको बेला १ बर्ष पुरै प्रत्येक महिना २ सय घण्टा भन्दा बढि काम गरेको पत्ता लागेकोले अनुमति दिएको भन्दा दायरा बाहिर गई गतिविधिहरू गरेको र जापानको कानून पालना नगरिएको ठहर गरी भिसा अनुमति नदिइएको ।
जापानी व्यवसायिक कलेजबाट (सेन्मोन गाक्कोउ) स्नातक गरेका व्यक्तिको हकमा स्वीकृत घटना –
अन्तर्राष्ट्रिय आईटी संकायबाट प्रोग्रामिङ अध्ययन गरेका र स्नातक गरेका व्यक्तिले निर्माण कम्पनीमा प्रोग्रामिङ सम्बन्धि सिस्टम विकास गर्न ।
– कस्मेटोलोजी विभागबाट स्नातक गरेको व्यक्तिले सौन्दर्य प्रशाधन कम्पनीमा सौन्दर्य उत्पादनहरूको विकास र मार्केटिङमा काम गर्न ।
– अन्तर्राष्ट्रिय सञ्चार विभागबाट स्नातक गरेका व्यक्तिले जिन्जाई हाकेन कम्पनीमा विदेशी कर्मचारीहरूलाई कामका नियम र आचरणबारे सिकाउन र कर्मचारी व्यवस्थापन गर्न ।

अन्य अस्वीकृत घटनाहरु –
क. इन्फर्मेशन सिस्टम संकायबाट स्नातक गरेका व्यक्तिले रेस्टुरेन्ट कम्पनीमा कम्प्युटर प्रयोग गरी सेल्स सिइरे (खरिद समान) व्यवस्थापन गर्न,
ख. ग्राहकको बुकिङ व्यवस्थापन गर्न र स्टाफ व्यवस्थापनको काम गर्नका लागि आवेदन दिएकोमा त्यो रेस्टुरेन्ट कम्पनीका कर्मचारीहरू जम्मा १२ जना मात्र रहेकाले उल्लेखित काम मात्र गर्न प्राप्त काम छ भन्ने मान्यता दिन नसकिएको । ग्राहकको बुकिङ व्यवस्थापन भनेको नोटबुकमा रिजर्भेशनहरू लेख्ने काम मात्र भएकोले कुनै ज्ञान अथवा बौद्धिक प्रयोग गर्ने काम नभएकोले यो आवेदन अस्वीकृत गरिएको ।
ग. अन्तर्राष्ट्रिय सूचना व्यवसाय संकायबाट स्नातक गरेको व्यक्तिले कम्प्युटर पार्टस जाँच र मर्मत गर्ने कामका लागि कम्प्युटर निर्यात बिक्री कम्पनीमा जागिरको लागि आवेदन दिएकोमा अस्वीकृत भएको कारण कामको प्रकृति हार्डवेयर पार्ट्सको प्रतिस्थापन गर्ने डेटा ब्याकअप गर्ने काम भएकोले बौद्धिकता वा ज्ञान प्रयोग नहुने काम भएको निश्कर्ष निकालिएको ।
घ. सेनमोन गाक्कोको ७० प्रतिशत हाजिरी भएको व्यक्तिलाई अध्यागमन ब्यूरोले कारण सोधेकोमा आफू बिरामी भएकाले धेरै विद्यालयमा उपस्थित हुन नसकेको भनिए पनि विद्यालय अनुपस्थित हुँदा पार्ट टाइम काम गरेको प्रमाण भेटिएको र स्पष्टीकरण फरक भएकोले भीसा अस्वीकृत भएको ।
ङ. इलुस्ट्रेशन संकायबाट स्नातक गरेका व्यक्तिले विदेशीहरूका लागि अनुवाद र व्याख्या गर्दै कपडा बेच्ने पसलमा कपडा बेच्ने काम गर्ने भनी आवेदन दिएकोमा सेनमोन गाक्कोमा पढेको इलुस्ट्रेसन लगायत डिजाइनको कन्टेन्ट र कामको कन्टेन्ट बीच कुनै सम्बन्ध नभएकोले अस्वीकृत भएको ।
च. अन्तर्राष्ट्रिय सञ्चार संकायबाट सञ्चार अध्ययन गर्ने व्यक्तिको रेस्टुरेन्ट कम्पनीमा काम गर्नका लागि एउटा आवेदन दिएकोमा जहाँ नयाँ उत्पादनको आइडिया बारे सोच्ने, सेल्स, बिक्री ब्यबस्थान गर्ने र मार्केटिङ गर्ने भनी आबेदान गरिएको थियो तर सेनमोन गाक्कोमा पढेको कन्टेन्ट र कामको कन्टेन्ट बीच कुनै सम्बन्ध नभएकोले आबेदन स्वीकृत नदिने निर्णय भएको ।
छ . अन्तर्राष्ट्रिय सञ्चार संकायबाट जापानी दोभाषे पढेका ब्यक्तिले बोउएकी कम्पनीमा दोभाषेको रूपमा काम गर्ने भनी आवेदन दिएकोमा सेनमोन गाक्कोको परिणाम पत्रमा जापानीज स्तर सबै सी ग्रेड थियो र (ABC मध्ये सबैभन्दा कम ग्रेड) थियो । जापानी भाषा लेभलको अन्य प्रमाण पनि नभएकोले जापानी भाषा प्रयोग गरेर दोभाषेको रूपमा काम गर्न सक्छ भन्ने मान्यता दिन नसकी अनुमति रद्ध भएको ।

‘इन्जिनियर/मानविकी/अन्तर्राष्ट्रिय सेवा विशेषज्ञ’ भिसाको सम्बन्धमा यदि विश्वविद्यालयबाट स्नातक गरिएको छ भने, विश्वविद्यालयमा व्यावसायिक अध्ययन गरेको सामग्री र काम गर्न लागेको सामग्रीको बीचमा थोरै फरक भए पनि ठीकै हुने भनी अध्यागमन नियममा लेखिएको छ । यद्यपि, सेनमोन गाक्कोको स्नातक पछि अध्ययन गरेको सामग्री र भविष्यमा गर्न लागेको कामको सामग्रीसंग सम्बन्धित हुनुपर्छ ।***

Resource Person: Ogawa Bunkei
Translated by: Bishnu Tiwari
Licensed tax accountant, Gyoseisyoshi Lawyer
Email: [email protected] or [email protected]
Tel: 03-6903-8817 Mob.070-4339-497

प्रकाशित मिति: आइतबार, फाल्गुण ०७, २०७९

प्रकाशित समय: ८:०९:२१