हेलो सेन्सेइ - (५६) जापान आउँदा साथमा के ल्याउन पाईन्छ, के पाईंदैन ?

टोकियो – जापानमा रहेका नेपालीहरुका लागि भिसा, यहाँको करप्रणाली, व्यवसायिक कारोवारको लेखा व्यवस्थापन र सो संग सम्बन्धित लाग्ने कर लगायतका विविध बिषयमा जानकारी होस भन्ने उद्देश्यले सुरु गरिएको स्तम्भ ‘हेलो सेन्सेइ !’ मा यस पटक हामी जापानको भन्सार प्रणाली र आयात निषेधित वस्तुहरूका बारेमा जानकारी गराउने प्रयास गरेका छौं । जापान प्रवेश गर्दा विदेशबाट ल्याईएका केही निश्चित वस्तुहरूमा कर लाग्छ भने केही त्यस्ता वस्तुहरू पनि छन् ति जापानमा ल्याउन पाईदैन । जापान प्रवेशको क्रममा अन्तर्राष्ट्रिय विमानस्थलमा अध्यागमनको चेकजाँच भईसकेपछि आफ्नो ब्यागेजको भन्सारमा पुनः चेकजाँच गर्नुपर्छ । यसपटकको शृङ्खलामा जापानको भन्सारमा सामान चेकजाँच गर्दा अपनाईने नियमहरूका बारेमा प्रकाश पार्ने जमर्को गरिएको छ । सबैलाई अवगतै भएको कुरो हो जापान आउने क्रममा विमानका कर्मचारीहरुले सामान घोषणा फारम हस्तान्तरण गरेका हुन्छन् । यस कागजातलाई आफुले साथमा लिएर आएका सामानहरुको विवरण बारेको घोषणा फाराम भनिन्छ ।

जापानमा ल्याउन नपाईने वस्तुहरुमा लागूऔषध, बन्दुक लगायतका हातहतियारजन्य वस्तु, विस्फोटक पदार्थ, नक्कली नोट, अश्लील पत्रपत्रिका, बिक्रीबितरण प्रयोजनका लागि ब्रान्डेड भनिएका नक्कली सामानहरु आदि जापानमा ल्याउन पाईदैन । यस्ता सामानहरु ल्याईएको पाईएमा जापानको भन्सारद्वारा जफत हुन्छ ।
यसै वर्षदेखि ब्रान्डेड भनिएका तर नक्कली वस्तुहरू अनलाइनको माध्यमबाट विदेशबाट खरिद गरी जापानमा बिक्रीबितरण गर्न र व्यक्तिगत प्रयोजनका लागि पनि प्रतिबन्ध लगाईएको छ । अनलाइनमा खरिद गरी जापान मगाईएमा यस्ता सामानहरू जापानको भन्सारले जफत गर्दछ । जफत गरिएका यस्ता सामानको हर्जाना पाईदैन ।

१. निम्न खाद्य सामग्रीहरुको हकमा जापान प्रवेशअघि आफ्नो देशको अध्यागमनमा अनिवार्य पूर्वजानकारी गराउनुपर्दछ । मासु, तरकारी, फलफूल, जनावर, बोटबिरुवा आदि । यी सामानहरु साथमा लिएर आउनुपरेमा पूर्व जानकारी गराई चेकजाँच गर्नुपर्दछ र जापानको अध्यागमनलाई बुझाउने घोषणा फाराममा ती सामानहरुको विवरण स्पष्ट उल्लेख गर्नुपर्दछ ।
२. उपहारका लागि वा ब्यक्तिगत जुनसुकै प्रयोजनका लागि भएता पनि मासुजन्य वा फलफूल जस्ता सामानहरुको ‘निरीक्षण प्रमाणपत्र’ आवश्यक पर्दछ । यदि निरीक्षण प्रमाणपत्र छैन भने यसलाई जापानमा ल्याउन पाइने छैन ।
३. मासुजन्य खाद्यवस्तु सम्बन्धमा गोरु, कुखुरा, सुँगुर र भेडा जस्ता जनावरको मासुलाई निरीक्षण प्रमाणपत्र आवश्यक पर्दछ, चाहे त्यो काँचो मासु, हृयाम, ससेज, अन्य पकाएको मासु होस् वा जमेको फ्रोजन होस् ।
४. फलफूलजन्य खाद्यवस्तु सम्बन्धमा आँप, अम्बा, लिची, खुर्सानी आदिका लागि जापान प्रवेश गर्दा परीक्षण प्रमाणपत्र आवश्यक पर्दछ ।
५. बोटबिरुवा सम्बन्धमा, बोटबिरुवाको अतिरिक्त, काटिएको फूललाई पनि निरीक्षण प्रमाणपत्र चाहिन्छ । यदि निरीक्षण प्रमाणपत्र छैन भने त्यस्ता वस्तुहरु भन्सारले जफत गर्ने छ ।
६. जापान प्रवेश गर्दा करमुक्त वस्तुहरूमा, रक्सी ३ बोतल सम्म (प्रति बोतल ७६० एमएलसम्म), चुरोट २०० खिल्ली, परफ्यूम (सुगन्धित वस्तु) २ औंस (५६ एमएलसम्म)

यसैगरी अन्य वस्तुहरूको हकमा करीव २ लाख येन मुल्य बराबरको सामानमा कर लाग्दैन । एउटै वस्तुको मुल्य १० हजार येन वा कम भए पनि कर लाग्दैन । उदाहरणका लागि १ हजार येन मुल्य बराबरको ९ वटा प्याकेट चकलेट र ५ हजार येन मुल्य बराबरको एउटा नेकटाइ छ भने कर लाग्दैन ।

माथि उल्लेख गरिएको भन्दा बढि छ भने कर लाग्ने छ । यदि व्यवसायिक प्रयोजनका लागि हो भने २ लाख येन मूल्य बराबर भन्दा कम भएता पनि कर लाग्ने छ । यसका साथै साथमा १० लाख येन भन्दा बढी नगद वा १ किलोग्राम भन्दा बढी सुन छ भने पूर्व जानकारी गराउनुपर्ने छ । यसैगरी विदेशबाट जापानमा उपहार पठाउँदा अन्तर्राष्ट्रिय मेल मार्फत ‘अनकम्प्यान्ड ब्यागेज’ को प्रक्रिया अपनाएर पठाउनुहोला ।

Resource Person: Ogawa Bunkei
Translated by: Bishnu Tiwari
Licensed tax accountant, Gyoseisyoshi Lawyer
Email: [email protected] or [email protected]
Tel: 03-6903-8817 Mob.070-4339-4972

प्रकाशित मिति: शुक्रबार, मंसिर ०२, २०७९

प्रकाशित समय: १८:२०:०३