हेल्लो सेन्सेइ- (४९) यी हुन् : भिसा प्रक्रियामा अबदेखि आवश्यक पर्न सक्ने थप कागजात

टोकियो – जापानमा रहेका नेपालीहरुका लागि भिसा, यहाँको करप्रणाली, व्यवसायिक कारोवारको लेखा व्यवस्थापन र सो संग सम्बन्धित लाग्ने कर लगायतका बिषयमा जानकारी होस् भन्ने उद्देश्यले सुरु गरिएको स्तम्भ ‘हेलो सेन्सेइ !’ मा यसपटक हामी पछिल्लो समयमा जापान इमिग्रेशनले भिसा आवेदकहरुलाई माग्ने गरिएको अतिरिक्त कागजातहरु जस्तै कार्यरत स्टाफ लिस्ट, चिङ्गिनदाइच्योउ लगायतका बिषयमा जानकारी गराउने प्रयास गरिएको छ । उक्त कागजातहरु मध्यको एक होउतेइ ३ चोबोउ हो । होउतेइ ३ चोबोउ भनेको श्रम ऐनले तोकेको रोउदोउस्या मेइबोउ, चिङ्गिनदाइच्योउ र स्युकिन्बोउ हो ।

१. रोउदोउस्या मेइबोउ : यो स्टाफ लिस्टको बिषय हो । कम्पनी वा कोउजिन ब्यवसायको स्टाफ भए श्रम कानूनले तोकिएअनुसार स्टाफ लिस्ट बनाई कम्पनीमा सुरक्षित राख्नुपर्छ । अस्थायी वा आंशिक स्टाफ भए पनि उक्त सूची बनाउनुपर्दछ । श्रम कानून अनुसार कम्पनीले कार्यरत सबै स्टाफको निम्न बमोजिमको विवरण लेखेर सुरक्षित राख्नुपर्दछ ।

हरेक कर्मचारीको नाम, जन्ममिति, लिंग, ठेगाना, कार्यसामग्री (३० भन्दा कम कर्मचारी भएको कम्पनीको हकमा, कार्य सामग्री लेख्न आवश्यक छैन), बायोडाटा, कम्पनीमा प्रवेश मिति, सेवानिवृत्तिको मिति र सेवानिवृत्तिको कारण, यदि कसैको मृत्यु भएको भए मृत्यु भएको मिति र मृत्युको कारण आदि स्टाफले काम छोडे पछि पनि छोडेको ३ वर्षसम्म सुरक्षित राख्नुपर्दछ ।
इमिग्रेशनले कम्पनीमा कति जना स्टाफ छन् र के कस्तो काम गरिरहेका छन्, स्टाफको कम्पनीमा प्रवेश मिति हेर्दा साँच्चिकै सो कम्पनीमा काम गरिरहेका छन् कि छैन भन्ने निश्चित गर्छन् । बिदेशी कर्मचारी भएको अवस्थामा भिसाले अनुमति दिएको क्षेत्रमा मात्र काम गर्न पाउने हुंदा काम लगाउने बेलामा भिसा पनि निश्चित गर्नुपर्ने हुन्छ । कम्पनी प्रवेश गरेको बिषयमा पनि स्टाफले पहिलेको कम्पनी छोडेर अहिलेको कम्पनीमा कहिले प्रवेश गरे भन्ने पनि निश्चित गर्नुपर्ने हुन्छ । इमिग्रेशनमा रजिस्टर भएको कम्पनी प्रवेश मिति फरक पर्न गयो भने स्टाफको काममा आशंका हुन गई भिसा रद्ध भएका घटनाहरु बढ्दो छ ।

२. चिङ्गिनदाइच्योउ : यो स्टाफको १ वर्षको तलबको रेकर्ड हो । श्रम नियमअनुसार प्रत्येक महिनाको तलब भुक्तानी भौचर र अर्को १ वर्षको कर्मचारीको तलबको चिङ्गिन दाइच्योउ बनाई कम्पनीमा सुरक्षित राख्नुपर्दछ । कम्पनीमा कार्यरत मालिक, स्थायी वा अस्थायी कर्मचारी वा आंशिक स्टाफ भए पनि देहायअनुसारका विवरण लेखि सुरक्षित राख्नुपर्दछ ।
कार्यरत कर्मचारीको नाम, लिंग, पारिश्रमिक गणना अवधि (मासिक तलब कुन दिन देखि कुन दिनसम्म), काम गरेको दिन, काम गरेको घण्टा, ओभरटाइम, बिदा र लेट नाइट काम गरेको भए काम गरेको घण्टा, दिनमा ८ घण्टाभन्दा बढी ओभर टाइम गरेको भए जम्मा घण्टा आदि ।
यसैगरी बिदाको दिनमा पनि काम गरेको भए काम गरेको घण्टा, मध्यराति १० बजेदेखि बिहान ५ बजेसम्मको अवधिमा काम गरेको भए सो अवधिमा काम गरेको घण्टा, तलब स्केल र आधारभूत तलब भत्ता, तलबबाट कट्टा हुने रोजगारी बीमा प्रिमियम, स्वास्थ्य बीमा प्रिमियम, निवृत्तिभरण, आदिबाट कटौती गरिएको कर आदि ।
चिङ्गिन दाइच्योउ अन्तिमपटक तिरेको तलबको दिनबाट ३ वर्ष सुरक्षित राख्नुपर्छ । इमिग्रेशनले काम गरेको अबधि र तलब रकम हेर्ने भएकोले काम गरेको दिन अनि काम गरेको घण्टा हेरी उक्त कम्पनीमा साँच्चिकै काम गरे-नगरेको निश्चित गर्दछन् । काम गरेको दिन अनि घण्टा नलेखिएको भए त्यो कम्पनीमा साँच्चि नै काम गरे-नगरेकोमा आशंका रहन्छ । कम्पनीमा रोजगारी बीमा प्रिमियम, स्वास्थ्य बीमा प्रिमियम, निवृत्तिभरणमा छिरे-नछिरेको यो चिङ्गिन दाइच्योउबाट स्पष्ट हुन्छ ।

३. श्युकिनबोउ : कम्पनीमा कार्यरत कर्मचारीहरुको सिफ्ट तालिकालाई श्युकिनबोउ भनिन्छ । यदि टाइमकार्ड राखिएको छ भने त्यसले पनि हुन्छ तर स्टाफले काम गरेको रेकर्ड सुरक्षित राख्नुपर्दछ । जापानको श्रम कानूनअनुसार देहायमा उल्लिखित विवरण पनि सुरक्षित राख्नुपर्दछ ।

कार्यरत कर्मचारीहरुको नाम, काम गरेको दिन, काम सुरु हुने समय र अन्त्य हुने समय आदि पछिल्लो काम भएको मितिदेखि ३ वर्षसम्म सुरक्षित राख्नुपर्दछ । जसअनुसार होउतेइ ३ चोबोउ (रोउदोउस्यामेइबोउ, चिङ्गिन दाइच्योउ, स्युकिन्बोउ) श्रम ऐनले तोकेको हुनाले ३ वर्षसम्म सुरक्षित राख्नुपर्छ । सुरक्षित नराखेको खण्डमा ३० मान येनसम्म जरिवाना लाग्न सक्छ । आजभेलि इमिग्रेशनले माथि उल्लिखित कागजातहरु माग्ने गरेकोले ठीक दुरुस्तसंग बनाई सुरक्षित राख्नुहोला ।

Resource Person: Ogawa Bunkei
Translated by: Bishnu Tiwari
Licensed tax accountant, Gyoseisyoshi Lawyer
Email: [email protected] or [email protected]
Tel: 03-6903-8817 Mob.070-4339-4972

प्रकाशित मिति: बिहिबार, पौष २२, २०७८

प्रकाशित समय: १६:०७:२०