हेलो सेन्सेइ - (४१) महामारीले कम्पनी बन्द भए बैंकको कर्जा के हुन्छ ?

टोकियो – जापानमा रहेका नेपालीहरुका लागि भिसा, यहाँको करप्रणाली, व्यवसायिक कारोवारको लेखा व्यवस्थापन र सो संग सम्बन्धित लाग्ने कर लगायतका विविध बिषयमा जानकारी होस भन्ने उद्देश्यले सुरु गरिएको स्तम्भ ‘हेलो सेन्सेइ !’ मा यसपटक हामी महामारीका कारण कम्पनी बन्द भएमा बैंकबाट लिएको कर्जा के हुन्छ भन्ने बिषयमा जानकारी गराउने प्रयास गरिएको छ ।
लामो समयदेखि विद्यमान विश्वब्यापी कोभिड-१९ महामारीका कारण उत्पन्न विषम परिस्थितिमा ब्यवसायिक निरन्तरताका लागि बैंकहरूले ब्यवसायीहरुलाई सहुलियत कर्जा उपलब्ध गराउँदै आएका छन् । यसरी उपलब्ध गराईएका सहुलियत कर्जा निश्चित समयावधिभित्र अनिवार्य फिर्ता गर्नुपर्दछ । तर ब्यवसाय राम्रोसंग चल्न नसकेका कारण कर्जा फिर्ता गर्न नसकेको अवस्थामा हुने प्रावधानका बारेमा यहाँ चर्चा गरिएको छ ।
बैंकबाट लिईएको कर्जा पूर्वनिर्धारित योजना अनुसार तिर्न नसकेको अवस्थामा मासिक किस्ता रकम पूर्वनिर्धारित रकमभन्दा कम गराउन सकिन्छ । यसका लागि बैंकलाई अनुरोध गरी कर्जा फिर्ताको रि-स्याडुलिङ गर्न सकिन्छ । यसैगरी ब्याज कम गर्नका लागि रिफाइनान्सिङ गर्न सकिन्छ ।
१. यसो गर्दा अदालती प्रक्रियाबाट बाँकी रहेको कर्जा घटाउने र यसरी घटाई बाँकी रहेको कर्जा अनिवार्य फिर्ता गर्दै जानुपर्दछ ।
२. अदालती प्रक्रियाबाट कम्पनी बन्द भएमा बाँकी रहेको कम्पनीको कर्जा फिर्ता गर्नुपर्दैन । यसलाई जिकोउ हासान (होउजिन हासान) भनिन्छ । जिकोउ हासान गर्नका लागि केही निश्चित नियमहरु छन्, जस्तै लिएको कर्जा कुनै पनि हालतमा फिर्ता गर्न नसक्ने अवस्था भएको हुनुपर्ने, व्यवसाय सामान्य चलिरहेको अवस्थामा कर्जा तिर्न नसक्ने भन्ने कुरो मान्य हुँदैन ।
लेखा प्रतिवेदन (खेस्सानस्यो) को साइमुच्योउका भएको हुनुपर्दछ । साइमुच्योउका भनेको खेस्सानस्योको ब्यालेन्स सिटमा एसेट (सम्पति) भन्दा लियाबिलीटी बढी भएको अवस्था हो ।
जिकोउ हासान गरेको अवस्थामा जापानको क्रेडिट सूचना केन्द्र (सिआइसी) को डेटामा कालोसूचीको रूपमा दर्ज हुने हुँदा ५ देखि १० बर्षसम्म क्रेडिट कार्ड र बैंकसंग कर्जासंग सम्बन्धित कारोवार गर्न मिल्दैन । कम्पनी जिकोउ हासान भएपनि कर्जा लिने बेला मालिक ग्यारेन्टर बसेको छ भने मालिकले कर्जा फिर्ता गर्नुपर्दछ । यदि मालिकको पनि कर्जा फिर्ता गर्न नसक्ने अवस्था हो भने मालिकले पनि जिकोउ हासान गर्नुपर्दछ । मालिकले जिकोउ हासान गरेपछि भने बैंकको कर्जा फिर्ता नगरे पनि हुन्छ तर जिकोउ हासानको प्रक्रिया गर्दा अदालतमा बुझाएको साइमुच्योउखाको खेस्सान्स्योउले गर्दा मालिक बिजनेश भिसाबाहक हो भने नविकरणको बेलामा त्यसपछिको बिजनेस प्लान बुझाउनुपर्दछ । जिकोउ हासानको प्रक्रियापछि बिजनेस नगरिएको खण्डमा बिजिनेस भिसा अस्वीकृत भई भिसा रद्द हुन्छ ।
जिकोउ हासानको प्रक्रिया गर्दै नयाँ कम्पनी बनाउन त पाईन्छ तर कम्पनीको नाम मात्र फरक तर कामको प्रकृति सबै पहिलेकै जस्तो भयो भने पहिलेको कम्पनीको कर्जा नयाँ कम्पनीले तिर्नुपर्ने हुन सक्छ ।
बैंकबाट लिएको कर्जा कम्पनीको ब्यवसायिक प्रयोजनमा नलगाई मालिकले व्यक्तिगत प्रयोजनमा खर्च गरेको छ भने जिकोउ हासान गर्न मिल्दैन । उदाहरणका लागि बैंकबाट लिईएको कर्जा कम्पनीको ब्यवसायिक प्रयोजनमा खर्च भएको छ भने त्यो खर्च लागत अथवा सम्पतिमा भएको हुनुपर्छ नत्र कम्पनीको ब्यवसायिक प्रयोजनमा खर्च भएको मानिदैन ।
जिकोउ हासान गर्नका लागि ब्यवसाय घाटामा गई चरम बजेट अभाव भएको र टाँट पल्टेको अवस्था हुनुपर्छ । यसप्रकारको लेखा प्रतिबेदन (खेस्सानस्यो) बिजिनेस भिजा नविकरणको बेलामा व्यापार योजना र स्पष्टीकरण सहित इमिग्रेशनमा बुझाउनुपर्दछ । जिकोउ हासान पछि कम्पनी नहुने हुँदा इमिग्रेशनलाई चित्तबुझ्दो स्पष्टीकरण दिन नसके भिसा रद्द हुन पनि सक्दछ । ***

Resource Person: Ogawa Bunkei
Licensed tax accountant, Gyoseisyoshi Lawyer
Email: [email protected] or [email protected]
Tel: 03-6903-8817 Mobile 070-4339-4972

प्रकाशित मिति: शनिबार, साउन २३, २०७८

प्रकाशित समय: १३:१७:०४