हेल्लो सेन्सेइ - (३०) जापानमा जनशक्ति प्रदायक ब्यवसायिक अनुमति यसरी लिन सकिन्छ

टोकियो – जापानमा रहेका नेपालीहरुका लागि भिसा, यहाँको करप्रणाली, व्यवसायिक कारोवारको लेखा व्यवस्थापन र सो संग सम्बन्धित लाग्ने कर लगायतका विविध बिषयमा जानकारी होस भन्ने उद्देश्यले सुरु गरिएको स्तम्भ ‘हेलो सेन्सेइ !’ मा यस पटक हामी काममा परिचय (स्योउखाइ) गराउने ब्यवसाय (Shokugyō Shōkai jigyō) सुरु गर्दा अपनाउनुपर्ने आवश्यक प्रक्रियाका बारेमा जानकारी गराउने प्रयास गरिएको छ ।

जापानमा काम स्योउखाइ गर्ने ब्यापार सुरु गर्ने बेलामा जापान सरकारबाट अनुमतिपत्र लिनुपर्दछ । त्यसका लागि कम्पनी वा निजी व्यवसाय (Kojin jigyō) जुन भए पनि, निम्न मापदण्ड पूरा गर्न आवश्यक पर्दछ ।

१. काम स्योखाइ गर्नसक्ने प्रबन्धक (Shokugyō Shōkai Sekininsha) १ जना भन्दा बढि हुनुपर्ने हुन्छ । काम स्योखाइ गर्न सक्ने प्रबन्धक बन्नका लागि १ दिनको प्रशिक्षण लिएर परीक्षा उत्तीर्ण गर्नुपर्ने हुन्छ र ३ बर्षभन्दा बढि कामको अनुभव भएको हुनुपर्छ ।

गोपनियता र व्यक्तिगत जानकारी सुरक्षित गर्नसक्ने कार्यालय हुनुपर्दछ र कार्यालय बस्ने ठाउँबाट अलग हुनुपर्दछ । यदि अर्को कम्पनी संगै कोठा भाडामा लिएको हो भने, कोठामा पार्टेशन गरिएको र ढोका अलग अलग भएको हुनुपर्दछ । भाडाको (रेन्टल) अफिस भए पनि हुन्छ तर खुल्ला स्थान भएको रेन्टल अफिसको मान्यता हुँदैन । रेन्ताइ केइयाकु (कुनै एक ब्यक्तिले भाडामा लिएर फेरि अर्को ब्यक्तिलाई भाडामा दिनु) को अवस्थामा घरबेटीको अनुमतिपत्र आवश्यक हुन्छ ।

खेस्सान्स्योको कन्टेन्ट अनुमति प्राप्त गर्न सक्ने सामग्री भएको हुनुपर्दछ । खेस्सान्स्योको निरिक्षणको बारेमा कुल सम्पत्तिबाट कुल ऋण घटाएपछि कुल रकम ५०० मान येन वा बढि भएको हुनुपर्दछ । नगद पैसा र बैंकको खातामा १ सय ५० मान येन भन्दा बढि भएको हुनुपर्ने छ । कम्पनी स्थापना भएदेखि खेस्सान मिति पूरा भएको छैनभने कुलपूँजी ५ सय मान येन वा सो भन्दा बढि भएको हुनुपर्दछ । कम्पनीको तोहोनमा व्यापार उद्देश्य काम स्योउखाइ गर्ने भनि लेखिएको हुनुपर्दछ । यदि नलेखिएको भए होमक्योकुमा गएर उद्देश्य थप्नुपर्ने हुन्छ ।