लण्डन– बेलायतको वकिङ सहर नजिकै किरात राईहरुको आफ्नै भूमि ग्याम्बलस लेन, रिप्ले अवस्थित माङखिम तथा साकेलास्थल किरात राई घरमा उभौली यालेदोङ (५०७५) साकेला २०७२ फरकरुपमा मनाए ।
भव्यरुपमा साकेला मनाउन केही महिना अगाडि देखि नै तयारीमा जुटेका राईहरु उक्त दिन भने महाभूकम्पको कारण फरक ढंगमा प्रस्तुत भएको पाइयो ।
कार्यक्रममा कुनै व्यानर र सजावटहरु थिएनन् । कसैले व्याजहरु नलगाएपनि पाहुनालाई, खादाले स्वागत र मुख्य मञ्चमा भूकम्प आर्थिक राहत संकलन भन्ने ब्यानर राखिएको थियो ।
कार्यक्रमको प्रारम्भमा मञ्चमा समवेदना श्रद्वाञ्जली, भूकम्पमा परी अकालमै मृत्यु हुनेहरुको चिरशाशान्तिको कामना गर्दै उपस्थितहरु सम्पूर्णले दिप प्रज्वलन गर्नुको साथै किराती धामीले सवैलाई चोख्याउने कार्य गर्नु भएको थियो ।
कार्यक्रमको दोस्रो भागमा किरात राईहरु भुमि पुत्र अनि प्रकृति पुजक भएको हुँदा साकेलाको पुजा र यो संकटकाल फेरि नदोहोरीन भनी धामीबाट शिली भूमे पुजा विधिपूर्वक सम्पन्न गरी अन्तमा आर्थिक राहत संकलन को कार्य दिनभर गरेका थिए ।
गतसालहरुमा साकेला सिली प्रतियोगिता अनी उभौली धुमधाम संग मनाए पनि यो वर्ष त्यस्तो नभएको र पुजा आराधनामा मात्र सीमित रहेको साकेला उभौली साकेला कोर्डीनेटर तथा संघका उपध्यक्ष श्री चन्द्रवहादुर राईले बताउनुभयो ।
स्वदेशमा महाभूकम्प पीडितहरुका लागि करिब ६ लाख नेपाली रुपैयाँ राहत उक्त दिनमा संकलन गरिएको जानकारी संघका कोषाध्यक्ष डम्बर राईले बताउनुभयो । त्यसअघि पनि राहत संकलन भइसकेको र अझै भइरहेको र हालसम्म किरात राई यायोक्खा बेलायतले करिब ३१ लाख नेपाली रुपैयाँ उठिसकेको अध्यक्ष राईले जानकारी दिनुभयो ।