टोकियो – जापानको लामो चिसो मौसमले बिस्तारै बिदा लिन गईरहेको छ भने हल्का न्यानोपनको मात्रा बढ्दै गईरहेको बेला यहाँका नेपाली समुदायमा रहेका संघसंस्थाहरुद्वारा कार्यक्रम आयोजनाको लहर शुरु हुन थालेको छ । यसै सन्दर्भमा आज आइतवार टोकियोमा बिभिन्न सँस्थाहरुद्वारा बिभिन्न कार्यक्रमहरुको आयोजना गरिएका छन् । जसअनुसार एशिया फ़्रेण्डशीप एसोसियसनको आयोजनामा साइतामाकेनको कावागोयमा नेपाली कथानक चलचित्र “बाटो मुनिको फ़ूल” प्रदर्शन हुन गईरहेको छ भने सोही दिन नेपाल मगर संघ जापानले टोकियोमा ३० औं मगर दिवस तथा १३५ औं प्रथम सहिद लखन थापा स्मृति दिवस मनाउन गईरहेको छ ।
यसैगरी आजै एनआरएन जापानले आफ्नो कार्यकालको झण्डै आधा बर्ष बित्दै गर्दा भावी कार्यदिशा तय गर्न टोकियो सिनओकुबोको मिलन रेष्टुरेन्टमा बिभिन्न संघसंस्थाहरुसंग अन्तरक्रिया तथा सुझाव संकलन कार्यक्रमको आयोजना गरेको छ ।
यसरी जापानको सानो समुदाय र कहालिलाग्दो ब्यस्तताका बिच एकै दिन एउटै शहरमा यति धेरै कार्यक्रमको आयोजना गरिनुले संघसंस्थाहरुबीचको सहकार्य, समन्वय र सूचना आदानप्रदानमा कमीकमजोरी रहेको पुष्टी मात्र गर्दैन, आयोजित कार्यक्रमको महत्व र सहभागिताको पक्षलाई पनि प्रत्यक्ष असर पार्ने हुँदा कुनै पनि सँस्थाले सार्बजनिक कार्यक्रमको तिथिमिति तय गर्दा ध्यान दिनुपर्ने यहाँका बुद्धिजीवीहरुको सुझाव छ ।
यसैगरी आगामी महिनाको ३ तारिख नागोयामा नेपाली बिद्यार्थी समाज जापानको “नेसाज डे” कार्यक्रम हुन गईरहेको छ भने ११ तारिख आइतवार “We For All” को आयोजनामा “अलिसा बचाउ अभियान” का सहयोगीहरुलाई सम्मान गर्न टोकियोमा एक समारोह हुन गईरहेको छ ।
यसैगरी मार्च १८ तारिख आइतवार थकाली सेवा समिति जापानले हरेक बर्ष आयोजना गर्दै आएको शुभकामना साँझको २१ औं शृँङखला टोकियोमा सम्पन्न गर्ने भएको छ र उक्त कार्यक्रममा थसेस जापानले टेलिशृँङखला “मेरी बास्सै” का चर्चित हास्यजोडी धुर्मुसे र सुन्तलीलगायत अन्य गायक कलाकारहरुलाई मेगुरो कुमिन सेन्टरमा उतार्ने भएको छ ।
यसरी जापानका ब्यस्त नेपालीहरुको हप्तामा १ दिन आउने बिदा लामबद्ध कार्यक्रमहरु सबैमा सहभागिता जनाउने हो भने महिनौका लागि बुकिङ भईसकेको मान्नुपर्ने अवस्था रहेको भावी कार्यक्रमका तालिकाहरुले बताउँछन् । ***
