नेपाली राजदूतावास टोकियो जापानले आइतवार एक समारोहको आयोजना गरी जापानका लागि नेपाली राजदूत डा. गणेश योञ्जन तामाङको बिदाई गर्नुकासाथै दशैं भेटघाट तथा शुभकामना आदान प्रदान कार्यक्रम सम्पन्न गरेको छ ।
सो समारोहमा आफ्नो चार बर्षो कार्यकाल पूरा गरी स्वदेश फ़र्कन लाग्नुभएका राजदूत डा. तामाङको बिदाई गरियो । राजदूत डा. योञ्जन र उहाँकी धर्मपत्नी मीना तामाङलाई दूतावासका उपनियोग प्रमुख डा. दर्गाबहादुर सुबेदी क्षेत्री र उहाँकी धर्मपत्नीले खादा तथा फूलको गुच्छाले बिदाई गर्नुभएको थियो । सो अवसरमा राजदूत दम्पतीलाई जापानबासी बिभिन्न क्षेत्रका नेपालीहरुले पनि बिदाई गरेका थिए ।
यसअघि समारोहमा बोल्दै उपनियोग प्रमुख डा. सुबेदी क्षेत्रीले नेपालीहरुको महान चाड बडा दशैंको उपलक्ष्यमा सुख, समृद्धि, सुस्वास्थ्य र प्रगतिको कामना गर्नुभयो । उहाँले राजदूत डा. तामाङको कार्यकालको समिक्षा गर्दै बिगत चार बर्षमा नेपाल र जापान दूवै देशमा बिद्यमान अत्यन्तै राजनैतिक तरल अवस्थामा पनि जापानबाट नेपालका लागि हुने सहयोग, सदभाव र सदासयतामा कुनै कमी आउन नदिनु नै राजदूत डा. तामाङको कार्यकाल सफल रहेको प्रमाण भएको बिचार ब्यक्त गर्नुभयो । उहाँले उक्त अवधिमा दूवै देशमा बिभिन्न खालका दैवीप्रकोपजन्य घटना घटेको, नेपालमा ५, ५ जना प्रधानमन्त्री र परराष्ट्रमन्त्री र जापानमा ५ जना प्रधानमन्त्री र ६ जना परराष्ट्रमन्त्री फेरिएका जस्ता अनिश्चित अवस्थामा पनि राजदूत डा. तामाङले आफ्नो जिम्मेवारी सफलतापूर्वक सम्पन्न गरेकोमा हार्दिक बधाई दिदैं आगामी दिनहरुमा पनि उहाँको अनुभव र कार्यकुशलतालाई मुलुकको हित हुने कार्यमा उपयोग गरिनुपर्नेमा जोड दिनुभयो ।
यसैगरी बिदाई तथा दशैं समारोहमा बोल्दै राजदूत डा. तामाङले बडा दशैले नेपालीहरुमा सामाजिक, साँस्कृतिक र भौगोलिक एकताको सन्देश प्रबाह गर्ने हुँदा यो पर्व सदियौंदेखि नेपाली समाजमा महत्वपूर्ण पर्वकोरुपमा मनाईदै आएको बिचार ब्यक्त गर्नुभयो ।उहाँले दशैं पर्वको बिशेषताबारे चर्चा गर्दै यो पर्व कुनै एकल धर्म, जाती र सम्प्रदायको मात्र नभएर सबै नेपालीको साझा पर्व भएको र सोहीअनुरुप मनाईदै आएको बिचार ब्यक्त गर्दै यस अवसरमा सबै नेपाली दाजुभाई तथा दिदिबहिनी, जापानी मित्रहरु सबैमा हार्दिक शुभकामना ब्यक्त गर्नुभयो । उहाँले नेपाल र जापान दूवै मुलुकमा बिद्यमान बिषम परिस्थितिमा पनि आफ्नो जिम्मेवारी पूरा गर्नका लागि बिभिन्न ढंगले सहयोग गर्ने सबैप्रति हार्दिक धन्यबाद ब्यक्त गर्दै जापानमा सिकेका, भोगेका र अनुभव गरेका सकारात्मक कुराहरुलाई मुलुक निर्माणमा उपयोग गर्ने प्रतिबद्धता पनि जाहेर गर्नुभयो ।
राजदूत निवास नाकामेगुरो टोकियोमा भएको सो कार्यक्रममा जापानमा रहेको नेपाली समुदायका बिभिन्न क्षेत्रका प्रतिनिधित्व गर्ने उल्लेख्य नेपाली तथा जापानीहरुको सहभागिता रहेको थियो । कार्यक्रममा माया नेपाली संगीत संस्थाको संयोजनमा जापानी कलाकारहरुले नेपाली सँस्कृति झल्काउने बिभिन्न खालका नृत्य प्रस्तुत गरेर मनारञ्जन प्रदान गरेका थिए । कार्यक्रमको सञ्चालन तथा भाषानुवाद जिज्ञानकुमार थापाले गरेका थिए । औपचारिक समारोह पछि कार्यक्रम रात्रीभोजमा परिणत भएको थियो ।***
