काठमाडौँ – पोर्चुगल युरोकप फुटबलको सेमिफाइनलमा प्रवेश गरेको छ । फ्रान्समा जारी प्रतियोगिता अन्तर्गत बिहिबार राति भएको पहिलो क्वार्टरफाइनल खेलमा पोल्यान्डलाई टाइब्रेकरमा ५–३ ले पराजित गर्दै पोर्चुगलले अन्तिम चारमा ठाउँ पक्का गरेको हो ।
खेलको दोस्रो मिनेटमै पोल्यान्डका रोर्बट लेवान्डोस्कीले गोल गर्दै टोलीलाई शुरुआती अग्रता दिलाएपनि ३३ औं मिनेटमा पोर्चुगलका रेनाटो सान्चेसले गोल गर्दै खेललाई बराबरीमा ल्याए । त्यसपछि निर्धारित समयमा दुवै टोलीका तर्फबाट कुनै गोल भएन र खेल अतिरिक्त समयमा धकेलियो । अतिरिक्त समयको ३० मिनेटभित्र पनि दुवै टोलीका तर्फबाट कुनै गोल हुन नसकेपछि पेनाल्टी सुटआउटबाट निर्णय लिइएको थियो ।
पेनाल्टी सुटआउटमा भने पोर्चुगलले ५–३ ले पोल्यान्डलाई पराजित गर्दै सेमिफाइनल यात्रा सुनिश्चित गरेको हो । सेमिफाइनलमा पोर्चुगलले बेल्जियम र वेल्समध्येको विजेतासँग खेल्ने छ । यी दुई टोलीबीचको खेल आज राति हुँदैछ । पोर्चुगल युरोकपको सेमिफाइनलमा पुगेको यो चौथो पटक हो ।
