-
धनी पर्यटकहरूका लागि फुकुयामा महलमा विलासी बसाइ योजना सुरू गरिएको हो
टोकियो – पश्चिम जापानको फुकुयामा सहरले ४०० वर्ष पुरानो ‘फुकुयामा महल’मा रातभर बस्ने सुविधा प्रदान गर्न थालिएको छ । देशको पर्यटन वृद्धिसँगै क्षेत्रीय अर्थतन्त्रले धनी पर्यटकहरूलाई आकर्षित गर्ने उदेश्यले महल रातभर बस्नका लागि खोलिएको हो ।
यो पहलअन्तर्गत पहिलो पाहुनाहरू गत अक्टोबर महिनामा महलमा बसोबास गरेका थिए । योजना अनुसार दुई जनाका लागि एक रातको दर १ दशमलब ३२ मिलियन येन (८ हजार ५ सय अमेरिकी डलर)बाट सुरू हुन्छ । यसमा पुनर्निर्माण गरिएको चन्द्र-दृश्य गुम्बजमा बास बस्न पाउने, महलको मुख्य भागमा रात्री लाउञ्ज अनुभव गर्ने, विशेष स्नानगृहको सुविधा प्रयोग गर्न पाउने र विलासी परिकारहरूको मजा लिन पाउने व्यवस्था गरिएको छ ।यस अनुभवको महत्वपूर्ण अंशका रूपमा, पाहुनाहरूलाई सामान्यतया सर्वसाधारणका लागि बन्द रहने फुशिमी यागुरा गुम्बजको विशेष भ्रमण गराइन्छ । यो काठको संरचना जापानी महलहरूका पुराना गुम्बजहरू मध्ये एक हो, जसलाई राष्ट्रिय रूपमा महत्वपूर्ण सांस्कृतिक सम्पत्ति घोषित गरिएको छ ।
मानिन्छ कि यो गुम्बज प्रारम्भमा क्योटोको दुर्भाग्यपूर्ण फुशिमी महलमा निर्माण गरिएको थियो र पछि सन् १६२२ मा फुकुयामा महल निर्माण हुँदा यहाँ सारिएको थियो । सन् १९४५ को अगस्ट महिनामा हिरोशिमा प्रिफेक्चरको फुकुयामा सहरमा भएको युद्धकालीन बम आक्रमणमा महलको मुख्य भाग र अन्य संरचनाहरू नष्ट भए पनि, यो गुम्बज सुरक्षित रह्यो । पछि महलको मुख्य भाग १९६६ मा पुनर्निर्माण गरियो ।सहरका एक सरकारी अधिकारीले पर्यटकहरूले यस ऐतिहासिक स्थलको महत्त्व बुझ्ने अवसर पाउने र संरक्षणको आवश्यकताको महसुस गर्ने आशा व्यक्त गरे । महल अवस्थित स्थल ऐतिहासिक रूपमा ‘कोमोरियामा’ अर्थात् चमेरो पहाड भनेर चिनिन्थ्यो र फुकुयामाको चमेरो(थीमयुक्त लोगोको तुलना ‘ब्याटम्यान’ कमिक श्रृंखलाको चिह्नसँग गरिन्छ । सन् २०२२ मा फुकुयामाले यस श्रृंखलाको काल्पनिक सहर गोथम सिटीसँग मैत्री सहर सम्झौता गर्ने विश्वकै पहिलो सहर भएको घोषणा गर्यो ।
यो महल धनी पर्यटकहरूका लागि तयार गरिएका योजनाहरूमा समावेश भएको छ । यस्ता योजनाहरू पश्चिम जापानकै कागावा प्रिफेक्चरको मरुगामे महल र एहिमे प्रिफेक्चरको ओजु महलमा पनि लागू गरिएका छन् । हाल जापानमा पर्यटन तीव्र रूपमा वृद्धि भइरहेको छ, तर अधिकांश गतिविधिहरू टोकियो र क्योटो जस्ता स्थानहरूमा सीमित छन् । यसकारण, सरकार र व्यवसायहरूले कम घुमफिर गरिने क्षेत्रहरूमा पनि पर्यटकहरूलाई आकर्षित गर्ने उपायहरू खोजिरहेका छन् ।