काठमाडौं– न्यून रकमको कोष खडा गरेको भन्दै आलोचना भएपछि सरकारले भूकम्प पीडितको राहत तथा पुनर्स्थापनाका लागि खडा गरेको दुई खर्ब रुपैयाँको कोष तीनवर्षे अवधिका लागि भएको स्पष्ट पारेको छ । अर्थमन्त्री डा. रामशरण महतले भूकम्पले क्षतिग्रस्त संरचना तीन वर्षमा पुनर्निर्माणका लागि मात्र कोष खडा गरिएको जानकारी दिनुभयो ।
व्यवस्थापिका संसद्अन्तर्गतको अर्थसमितिको बैठकमा सभासद्हरूले दुई खर्ब रुपैयाँको कोष कम हुने भन्दै २० खर्ब रुपैयाँको पुर्ननिर्माण कोष बनाउन सरकारलाई सुझाव दिएका थिए ।
बैठकमा बोल्ने अधिकांश सभासद्ले दुई खर्बको कोष बनाउँदा कम रकम आउने तथा २० खर्बको कोष बनाएर सोअनुसारको सहयोग माग्दा बढी रकम आउने भन्दै कोषको रकमको आकार बढाउनुपर्ने बताएका हुन् । यद्यपि अर्थ समितिको बैठकले कति रुपैयाँको कोष बनाउने भनेर निर्णय भने गर्न सकेन ।
सरकारले भूकम्पबाट क्षतिग्रस्त संरचना निर्माण तथा राहतका लागि दुई खर्ब रुपैयाँको कोष निर्माण गर्ने र यसमा सहयोग गर्न अन्तर्राष्ट्रिय समुदायलाई आग्रह गर्ने बताएको छ । अर्थमन्त्री महतले सरकारले व्यावहारिक भएर दुई खर्ब रुपैयाँको कोष खडा गरेको बताउनुभयो ।
अर्थमन्त्री महतले राहत तथा पुनस्र्थापनाअन्तर्गत तीन वर्षसम्म भूकम्पले क्षतिग्रस्त संरचना पुनर्निर्माण गर्ने र त्यसपछि अर्को चरणको प्रक्रियामा विकास निर्माणको काम हुने बताउनुभयो । अर्थमन्त्री महतले आगामी आर्थिक वर्षको बजेट भूकम्प प्रभावितको राहत तथा पुनर्स्थापनामा केन्द्रित हुने जानकारी दिनुभयो ।
भूकम्पको क्षतीग्रस्त संरचना पुनर्निर्माणका लागि दुई महिनाभित्रमा नेपाललाई सहयोग गर्ने दातृ निकायको सम्मेलन गर्ने सरकारको योजना छ । ***
