काठमाडौं– नेकपा एमालेका नेता केपी शर्मा ओलीले शान्ति प्रक्रियाप्रति इमान्दार नभए माओवादी समाप्त हुने बताएका छन् ।नेपालगञ्जमा एमाले कार्यकर्तालाई सम्बोधन गर्दै ओलीले माओवादी नेताहरु कोही शान्ति र कोही क्रान्तिको पक्षमा रहेको भन्दै नेपालमा अब कुनैपनि सशस्त्र क्रान्ति सफल हुने अवस्था नरहेको बताउनुभयो ।
माओवादी भित्रको विवाद पदका लागि भन्दै ओलीले माओवादी नेतृत्वले विगतमा युद्धको तयारी गरेको भनेर कार्यकर्ता झुक्काएकोले अहिले आफैले खनेको खाल्डोमा परेको टिप्पणी गर्नुभयो ।
कार्यकर्तालाई लामो समय भ्रममा राखेकाले माओवादीभित्र बिरोध र विद्रोहको स्वर उठेको बताउँदै एमाले नेता ओलीले भने,- ‘सरस्वती पुजा गर्न बनाएको मुर्तिझै माओवादीले जनयुद्धलाई सेलाईसकेको छ ।’ तीन बर्षअघि नै सुल्झीसकेको शान्ति प्रक्रियालाई माओवादीबाट लडाकुको पैसाको थैली कुम्ल्याउन लम्ब्याएको उनले आरोप लगाए । जनयुद्धको तयारी भन्दै लडाकुका नाममा पार्टीले पैसा कुम्ल्याएकाले आफैले खनेको खाल्डोमा पर्ने डरले प्रक्रियालाई लम्ब्याएको उनको भनाई छ ।
