समाचार सुन्नुहोस :
काठमाडौँ – टेस्ला, स्पेसएक्स, स्टारलिंकजस्ता विश्वप्रसिद्ध कम्पनीका मालिक एलन मस्क मानव इतिहासकै सबैभन्दा धनी व्यक्ति बनेका छन्। ब्लुमबर्ग बिलियनेयर्स इन्डेक्सका अनुसार, मस्कको कुल सम्पत्ति चमत्कारिक रूपमा वृद्धि भई ३ खर्ब ४८ अर्ब अमेरिकी डलर पुगेको छ। जुन नेपाली रुपैयाँमा करिब ४६९ खर्ब ८५ अर्ब ६० करोड २८ लाख बराबर हो।
मस्कको सम्पत्तिमा यो अभूतपूर्व वृद्धि मुख्यतः टेस्लाको सेयर मूल्यमा आएको तीव्र वृद्धिका कारण भएको हो। अमेरिकी राष्ट्रपतीय निर्वाचनपछि, विशेषगरी डोनाल्ड ट्रम्पको विजयसँगै, टेस्लाको सेयर मूल्य ४० प्रतिशतले उकालो लागेको थियो। मस्कले ट्रम्पको समर्थन गर्दै चुनावी अभियानमा आर्थिक सहयोगसमेत प्रदान गरेका थिए।
यससँगै, मस्कको कृत्रिम बुद्धिमत्तासम्बन्धी कम्पनी ‘एक्सएआई’ को सेयर मूल्यमा पनि उल्लेखनीय वृद्धि भएको छ। यस कम्पनीको मूल्यांकन ५० अर्ब अमेरिकी डलर पुगेको छ। जसले मस्कको सम्पत्तिमा थप १३ अर्ब अमेरिकी डलरको योगदान गरेको छ।
पछिल्लो एक वर्षमै मस्कको सम्पत्ति १ खर्ब १९ अर्ब अमेरिकी डलरले वृद्धि भएको ब्लुमबर्गले जनाएको छ। यस्तो आर्थिक उचाइले मस्कलाई व्यवसायिक क्षेत्रको नेतृत्वमा स्थापित मात्र गराएको छैन कि इतिहासमै सबैभन्दा धनी व्यक्ति बनाएको छ।
