मेरो कर्णाली धेरै पटक रोएको मैले देखेको छु तर, आजसम्म निच्च दाँत निकालेर एक क्षण, एक पल पनि देखावटी हाँसोसम्म हाँसेको देखेको छैन मैले । कर्णाली धेरै पटक विभिन्न बहानामा आन्दोलन गर्दा किन नहोस् बाढीपहिरोदेखि महामारी जस्ता ठूलाठूला प्राकृतिक प्रकोपसम्मको दुःख कष्ट भोगेको देखेको छु मैले । तर कहिले पनि कर्णाली हाँसेको अर्थात कर्णालीका लागी खुसीको पल आएको देखेको नै छैन ।
हामीले पटक पटक शुभकामना, शुभेक्षा व्यक्त गर्दै संविधान सभामा होस् या प्रतिनिधि सभामा होस् या त स्थानीय निकायमा नै किन नहोस, कहिले हाम्रालाई पनि, कहिले राम्रालाई पनि जिताई रह्यौं, अनि भव्य विजय जुलुससहित सफल कार्यकालको शुभकामनासँगै बधाई दिइरह्यौँ । तर त्यति बेला पनि मेरो कर्णालीका लागी शुभकामना दिने कुनै सुन्दर पल नै आएन ।
मेरा बाजे, बुवादेखि आज मैलेसम्म कर्णालीका उच्च पदस्थदेखि सामान्य नेता कार्यकर्तासम्मलाई शुभकामना अनि बधाई दिदै आएको छु । तर आजसम्म कर्णालीले बधाई पाउँने एक क्षणसम्म पनि कुनै दिन नै आएन । म सोचिरहेछु, मेरो कर्णालीले बधाई पाउने दिन कहिले आउँछ होला ? म सोचिरहेछु, हामीले नेता, कार्यकर्ता, मन्त्रीलाई दिएको शुभकामनाको जवाफ कहिले आउँछ होला ? सायद आजसम्म हामी सारा जनताले दिएको शुभकामना कर्णालीले पाएको भए कर्णाली कति कायापलट हुँथ्योहोला । है, म सोचिरहेछु ।
थुप्रै चुनावहरू, थुप्रै अविरजात्रा गरियो तर, अविरजात्रा र बधाईका थुप्रै पुष्पागुच्छा कहिले पनि खुसी भएको मैले देखिन । बधाईलाई पनि लाग्दो हो । यहाँ यस्तै यस्तै गज्जबको रंगमंच चलिरहेछ सबथोक फेरियो तर, यो कर्णालीको अवस्था, परिवेश कहिले पनि फेरिएन । सामान्य कार्यकर्ता ठूला(ठूला नेता बने, हिजोका ठूलाठूला नेता मन्त्री, बने तर उहाँले हामीलाई अर्थात यो कर्णालीलाई बधाईको जवाफ नै दिनुभएन । सायद बिर्सिनु भयो की ?
तर मेरो ठूलो प्रतिक्षा छ, कर्णाली हाँसेको हेर्नलाई, कर्णालीले भव्य रूपमा पुष्पागुच्छाले अविरजात्रा गर्दै बधाई सहित शुभकामना पाउने दिन । जून दिन यस्तो दिन आऊनेछ, त्यो दिन कर्णालीको विकासको गतिमा कायापलट भएको हुनेछ । त्यो दिन आफ्नो परिवारको पालनपोषण गर्न र हामी विदेशिएका युवाहरू आफनै घरआँगनमा परिश्रम गर्ने योजना गर्दै हुनेछौं, त्यो दिनमा मेरो कर्णालीमा थुप्रै ठूला ठूला उद्योग–धन्दा खोलिएका हुनेछन् । त्यो क्षण सारा कर्णालीवासीको मनदेखि हाँसेका हुनेछन् । त्यो दिन कर्णालीले थुप्रै पुष्पागुच्छासहित शुभकामना तथा बधाईका थुप्रै सन्देशहरू पाउनेछ । म र हामी यहि उदेश्यका साथ लागीपरेका नवगठित कर्णाली समाज जापान पनि मनदेखि हाँसेको हुनेछ ।
- भिम न्यौपाने -हाल ओकिनावा
