काठमाडौं – विश्वकप विजेता फ्रेन्च फुटबल टोलीलाई स्वदेशमा भव्य स्वागत गरिएको छ । रुसमा सम्पन्न विश्वकपको उपाधिसहित देश फर्किएको टिमलाई सोमबार पेरिसमा नागरिकहरुले भव्य स्वागत गरेका हुन् ।
पेरिसको सहरमा फ्रेन्च फुटबल टोलीले विश्वकपको ट्रफीसहित विजय र्याली निकालेको थियो । हजारौं फुटबलप्रेमीहरु सडकमा निस्किएर टोलीलाई साथ दिएका थिए ।
यसअघि, पेरिसको विमानस्थलमै उनीहरुलाई भव्य स्वागत गरिएको थियो । विश्वविजेता टोलीलाई फ्रान्सको सार्वोच्च सम्मान‘ लिजेन दी ओनोर’बाट सम्मानित गरिने बताइएको छ ।
२० वर्षअघि आफ्नै देशमा आयोजित विश्वकप फुटबलको उपाधि जित्दा पनि पेरिसमा यस्तै उत्सव मनाइएको थियो । रुसी राजधानी मस्कोमा फ्रान्सले विश्वकप जितेपछि समर्थकहरुले रातभर उत्सव मनाएका थिए । सोक्रममा केही सहरमा झडपसमेत भएको थियो ।
पेरिस, लियों, रौन, स्टासवर्गलगायतका सहरमा झडप नियन्त्रण गर्न प्रहरीले अश्रुग्यास प्रयोग गरेको बताइएको छ । उता, विश्वकपको फाइनलमा फ्रान्ससँग पराजित हुँदै उपविजेतामै सीमित बनेको क्रोएसियालाई पनि स्वदेशमा भव्य स्वागत गरिएको छ ।
क्रोएसियाको राजधानी जाग्रेबमा रहेको बाना जेलासिका स्क्वायरमा हजारौं नागरिकले लुका मोड्रिचको कप्तानीमा रहेको टोलीलाई स्वागत र सम्मान गरेका हुन् ।
रुसमा सम्पन्न विश्वकप फुटबल क्रोएसियाका लागि अहिलेसम्मकै सफल विश्वकप हो ।सन् १९९८ मा पहिलोपटक विश्वकप खेलेको क्रोएसिया प्रतियोगिताको फाइनलसम्म पुगेको यो नै पहिलो अवसर हो ।
