काठमाडौं – नेपाली भाषा तथा साहित्यको उत्थानमा उल्लेखनीय योगदान पुर्याए वापत पाँचजना स्रष्टालाई आज हीरक जयन्ती सम्मानबाट सम्मानित गरिएको छ । नेपाल प्रज्ञा प्रतिष्ठानको ६० औँ जन्मजयन्तीका अवसरमा यहाँ आयोजित एक कार्यक्रममा उहाँहरुलाई सो सम्मानबाट सम्मानित गरिएको हो ।
सम्मानित हुनेहरुमा राष्ट्रकवि माधवप्रसाद घिमिरे, वाङ्मय शताब्दी पुरुष सत्यमोहन जोशी, नेपाल प्रज्ञा प्रतिष्ठानका पूर्व कुलपति वैरागी काइँला तथा नेपाल प्रज्ञा प्रतिष्ठानका पूर्व उपकुलपतिद्वय मदनमणि दीक्षित र वासुदेव त्रिपाठी हुनुहुन्छ । प्रतिष्ठानका कुलपति गङ्गाप्रसाद उप्रेतीले उहाँहरुलाई सम्मान गर्दै नेपाली भाषा तथा साहित्यको उन्नयनमा सम्मानित व्यक्तित्वहरुको ठूलो योगदान रहेको बताउनुभयो ।
सम्मानित व्यक्तित्व राष्ट्रकवि घिमिरेले यो सम्मानले साहित्य लेखनका क्षेत्रमा आफूलाई प्रेरणा मिलेको बताउँदै आफूले लौरो टेकेर पनि कविता लेखन गर्ने प्रतिवद्धता व्यक्त गर्नुभयो । सो अवसरमा प्रतिष्ठानमा २० वर्ष सेवा अवधि पूरा गरेका गिता राई, भरत सुवेदी, जहरसिंह खडका, शिवनारायण महर्जन र सावित्री नेपालीलाई पदक तथा २५ हजार नगदसहित सम्मान गरियो ।
यसैबीच राष्ट्रिय कविता महोत्सव पनि आजै शुभारम्भ गरिएको छ । उक्त महोत्सवमा देशभरबाट ३२ प्रतियोगी तथा २० अप्रतियोगी सहभागी छन् । महोत्सवमा सहभागी हुन देशका विभिन्न स्थानबाट २२९ कविता पठाइएका थिए । त्यसमध्ये ३२ वटा कविता प्रतिस्पर्धामा छानिएका छन् ।
प्रतिष्ठानले विसं २०२२ देखि प्रत्येक वर्ष असार ९ गते कविता महोत्सव गर्दै आएको भए पनि २०७२ सालमा गएको भूकम्पका कारण महोत्सव गर्न सकिएको थिएन् ।
