काठमाडौं- आफू नयाँ दिल्ली रहेकाबेला पार्टी फुटेपछि बिरत्तिएका सद्भावना पार्टीका अध्यक्ष राजेन्द्र महतोले त्यसको दोष भने सभामुख सुवासचन्द्र नेम्वाङलाई लगाएका छन् ।उनले आफ्नो दल दोस्रो पटक पनि टुक्र्याउन सभामुख दोषि रहेको बताउँदै ‘मतियार’ भनी मुख छाडेका छन् । ‘मधेसी पार्टीहरुको फुटाउन सभामुख सुवासचन्द्र नेम्वाङ, जनशक्ति पार्टीका सहअध्यक्ष प्रकासचन्द लोहनी र मधेसी मोर्चाकै केही नेताहरु संलग्न छन्,’ रिपोर्टर्स क्लवमा सोमबार उनले भने । पार्टीका सभासद्द्वय रामनरेश राय र गौरी महतो कोइरीले नयाँ पार्टी गठन गरेपछि महतोले सभामुख ‘मतियार’ भएको आरोप लगाए ।
महतोले पार्टीले कारबाहीको लागि गरेको सिफारिस बेवास्ता गर्दै पार्टी फुटाउनेलाई दलको मान्यता दिने काम सभामुखले गरेको दाबी गरे । उनले भने, ‘यो दुखद र दुर्भाग्यपूर्ण छ ।’
स्वास्थ्य तथा जनसंख्या मन्त्रीसमेत रहेका महतोले सभामुखलाई मधेस विरोधी काम नगर्न चेतावनी दिंदै पार्टीको निवेदनलाई अनिर्णयको बन्दी बनाएर पार्टी फुटाएकोले त्यसको जिम्मा पनि लिनु पर्ने धारणा राखे । उनले भने, ‘मधेसविरोधी सभामुखलाई मधेसले सहयोग गर्दैन ।’
