टोकियो– सिरियाको अलेप्पो सहरमा एकजना जापानी पत्रकारको ज्यान गएको छ । सो समाचारपछि सिरियामा आन्दोलन सुरु भएपछि मारिने विदेशी पत्रकारको सङ्ख्या चार पुगेको छ ।सिरियाको द्वन्द्वग्रस्त सहर अलेप्पोमा जापानकी पत्रकार ४५ वर्षीया मिका यामामातोको ज्यान गएको बताइएको छ । सो कुराको जानकारी जापानको विदेश मन्त्रालयले मंगलबार एक विज्ञप्तिमार्फत दिएको हो ।
विगत करिब एक महिनादेखि सरकारी सेना र विद्रोहीको द्विपक्षीय भिडन्त जारी नै रहेको सो अलेप्पो सहरमा सरकारी सेनाको गोली लागेर उनको ज्यान गएको समाचारमा जनाइएको छ ।
यामामातो जापानको जापान प्रेस न्युज एजेन्सीमा कार्यरत पत्रकार हुन् । उनले सो संस्थामा सन् १९९६ देखि काम गरिरहेकी थिइन् । विदेश मन्त्रालयको विज्ञप्तिमा उनी एक कुशल द्वन्द्व पत्रकार रहेको बताइएको छ ।
यसअघि पनि उनले सन् अफगानिस्तान र इराकमा रही द्वन्द्व रिपोर्टिङ गरेकी थिइन् । उनी सिरियामा विगत केही महिनाअघिदेखि कार्यरत रहेकी थिइन् ।
अलेप्पो सहरबाट आफ्नो गन्तव्यतर्फ लाग्दै गर्दा एउटा सैनिक समूहले उनीमाथि गोली प्रहार गरेको प्रत्यक्षदर्शी समाचारदाताहरुले जनाएका छन् । उनीहरुका अनुसार गोली प्रहार गर्ने हतियारधारी विद्रोही समूहका थिए ।
तरपनि विद्रोही समूहले भने सो समाचारको खण्डन गरेको छ । सो समूहले सो क्षेत्रमा आफ्ना विद्रोही लडाकूहरु नरहेको दाबी गरेको छ । उसले जापानी पत्रकारको हत्या सरकारी सेनाले नै गरेको बताएको छ ।
सो हत्याको दृश्यलाई युटुबमा राखिएको छ । सो दृश्यमा समाचार सङ्कलनका लागि अलेप्पो हुँदै आफ्नै कारमा सवार ती समाचारदातामाथि आक्रमण भएको देखाइएको छ ।यसैबीच सो घटनापछि अरु तीनजना विदेशी पत्रकार पनि त्यहाँ हराएको अर्काे एक समाचारमा जनाइएको छ । एकजना अरबी पत्रकार भन्छन्– तीनजना सम्वाददाता हराएको समाचार प्राप्त भएको छ र अहिलेसम्म उनीहरुको अवस्थाबारेको कुनै खबर प्राप्त भएको छैन ।
यसअघि पनि सिरियामा एकजना अमेरिकी र दुई फ्रान्सेली पत्रकारको ज्यान गइसकेको छ । कतिपय द्वन्द्वग्रस्त क्षेत्रमा अहिले पनि समाचार सङ्कलनका लागि निकै गाह्रो भएको बताइन्छ ।
सरकारी ज्यादतिका समाचार विदेशी सञ्चारमाध्यमहरुले सम्प्रेषण गर्ने भएकोले विदेशी सञ्चारमाध्यमहरुलाई सिरियाको सरकारी सेनाले विगतदेखि नै तारो बनाउँदै आएको छ ।
