समाचार सुन्नुहोस :
काठमाडौँ – नेपाली कांग्रेसका नेता तथा राष्ट्रिय सभा सदस्य कृष्णप्रसाद सिटौलाले प्रधानमन्त्री केपी शर्मा ओली कांग्रेसको सहयोग बिना अघि बढ्न नसक्ने टिप्पणी गरेका छन्। काठमाडौंमा बिहीबार आयोजित पार्टीको कार्यक्रममा सम्बोधन गर्दै सिटौलाले वर्तमान सरकार कांग्रेसकै समर्थनमा टिकिरहेको दाबी गरे।
सिटौलाका अनुसार प्रधानमन्त्री ओली कांग्रेसको समर्थन र सहारामा निर्भर रहेका छन्। उनले भने, “केपी ओलीजी हाम्रो बल र सहारामा प्रधानमन्त्री हुनुहुन्छ। हाम्रो बिना उहाँ एक्लै अगाडि बढ्न सक्नुहुन्छ भन्ने कुरा सोच्न गाह्रो छ।”
वर्तमान सरकार विशेष परिस्थितिमा बनेको भन्दै उनले सरकारलाई जोगाएर लैजाने जिम्मेवारी सबैमा रहेको बताए। साथै, सिटौलाले कांग्रेसले सरकारलाई मात्र समर्थन नगरेर नीतिगत र व्यवहारिक स्तरमा प्रभावकारी काम गरेर जनताको मन जित्न आवश्यक रहेको धारणा राखे।
