सलमान खानको चलचित्र ‘नो इन्ट्री’ को सिक्वेल डिब्बा बन्द भएको निकै समय अघिदेखि खबर आइरहेको थियो । यसका बारेमा सलमान खानले पनि कयौँ पटक यसैतर्फ संकेत गर्नुभएको थियो । फिल्मीबिटका अनुसार चलचित्रका निर्देशक अनिस बज्मीले यो खबर अफवाह मात्र भएको बताउनुभएको छ ।
उहाँले सलमान खानलाई ‘नो इन्ट्री में इन्ट्री’ को स्क्रिप्ट निकै मन परेको बताउनुभएको छ । निर्देशक बज्मीले भन्नुभयो, “सलमानसँग मेरो निकै राम्रो मित्रता छ, यो चलचित्रमा उहाँ दोहोरो भूमिकामा देखिनुहुनेछ ।”
निर्देशकले चलचित्र डिब्बाबन्द भएको हल्ला आफूले चाल नपाएको बताउनुभयो । उहाँले भन्नुभयो, “म स्क्रिप्ट माथि अन्तिम काम गर्दैछु, म हाल ‘मुबारकां’ मा निकै व्यस्त थिएँ, अब सबै ट्रयाकमा आइसकेको छ । हामीलाई अब सलमानको मिति हेर्नु छ ।”
निर्देशक बज्मीले चलचित्रमा अनिल कपुर र फरदीन खानले पनि दोहोरो भूमिका निर्वाह गर्ने बताउनुभयो । तर अभिनेत्री भने अहिले फाइनल भएको छैन ।
