समाचार सुन्नुहोस :
काठमाडौँ – राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामिछाने आज पोखराबाट काठमाडौं आउँदैछन्। पोखराको सूर्यदर्शन सहकारी ठगी प्रकरणमा बिहीबार ६५ लाख धरौटी बुझाएर रिहा भएका लामिछाने, आज काठमाडौं जिल्ला अदालतमा उपस्थित हुन लागेका हुन्।
राष्ट्रिय स्वतन्त्र पार्टीका एक नेताका अनुसार, “लामिछाने साढे १ बजे विमानमार्फत काठमाडौं आइपुग्ने र सोही दिन अदालतमा उपस्थित हुने तयारी गरेका छन्।” प्रहरीले लामिछानेलाई आफैं अदालतमा उपस्थित हुने शर्तमा रिहा गरेको थियो। बिहीबार राति उनी पोखरामै बसेका थिए।
लामिछानेलगायत ६३ जनामाथि कास्की जिल्ला अदालतमा सहकारी ठगी, सम्पत्ति शुद्धीकरण र संगठित अपराधसम्बन्धी मुद्दा दर्ता गरिएको छ। सरकारी वकिल कार्यालयले १ अर्ब ५१ करोड रुपैयाँ बिगो मागसहित अभियोग पत्र दर्ता गरेको हो।
यसैबीच, काठमाडौंस्थित कालिमाटीको स्वर्णलक्ष्मी सहकारी ठगी प्रकरणमा पनि लामिछानेविरुद्ध मुद्दा दायर भएको छ। यस प्रकरणमा सहकारीले ६९० बचतकर्ताको १ अर्ब १९ करोडभन्दा बढी रकम हिनामिना गरेको आरोप लगाइएको छ। यसमा मुछिएका केही सञ्चालक धरौटी तिरेर रिहा भइसकेका छन्।
