बाजुरामा जीपको ठक्करबाट एक जनाको मृत्यु

समाचार सुन्नुहोस : 

काठमाडौँ – बाजुरा जिल्लाको बूढीनन्दा नगरपालिकास्थित पाण्डुसैनमा जीपको ठक्करबाट एक महिलाको ज्यान गएको छ।

कोल्टीबाट मार्तडी जाँदै गरेको सुपप्र ०१–००१–४४३० नम्बरको जीपले बाटोमा हिँडिरहेकी ६० वर्षीया रुपीसवा धामीलाई ठक्कर दिएको थियो। ठक्करबाट गम्भीर घाइते भएकी धामीलाई कोल्टी आधारभूत अस्पताल लैजाने क्रममा बाटोमै मृत्यु भएको जिल्ला प्रहरी कार्यालयका प्रहरी नायब उपरीक्षक दिलीपकुमार गिरीले जानकारी दिए।

बूढीनन्दा–१० घर भएकी धामी हाल बूढीनन्दा–९ पाण्डुसैनस्थित छोरीको घरमा बस्दै आएकी थिइन्। ठक्कर दिने जीपका चालकलाई नियन्त्रणमा लिई प्रहरीले घटना सम्बन्धमा अनुसन्धान सुरु गरेको छ।