टोकियो – चर्चित लोक गायक बद्री पंगेनीले शुक्रवार जापानको राजधानी टोकियोमा जापानबासी नेपालीहरुलाई भावविहवल बनाए ।
राष्ट्रिय झण्डा फहराउँदै स्टेजमा उत्रिएका बद्रीले ‘आमा बिदा पाउँदिन, अहिलेको साल पनि आमा घर आउँदिन’ बोलको गीत गाउँदा धेरै दर्शकहरुको आँखा रसाएका थिए । धन कमाउने आशामा परदेश पुगेका छोराहरुको व्यथालाई गीतमार्फत व्यक्त गर्दा धेरै आमाहरु धुरुधुरु रुन थाले ।
आमालाई भुलाउन स्टेजबाट तल झरेका बद्रीले पनि आफुलाई थाम्न सकेनन् । माइकको छेलपारी आफ्नो आँशु पुछे । आफूले गाएको गीतमा रोएका आमालाई सम्झाउँदै गायक बद्रीले मञ्चबाटै युवालाई स्वदेशमै रोजगारको व्यवस्था सुनिश्चित हुनुपर्ने बताए ।
‘कसैका छोरा छोरी पनि विदेश जान नपरोस्, नेपालमै आमाबुवासँगै बस्न पाइयोस्,’ बद्रीले भने, ’कोही पनि नेपालीले पेट पाल्न विदेशी भूमिमा गएर रगत पसिना बगाउन नपरोस् ।’
त्यस्तै गायक बद्रीले मुस्ताङ र जुम्लामा स्याउ कुहिएर खेर गएको तर राजधानी लगायतका सहरमा बिदेशी स्याउको भाउ बढेको सन्देश गीतबाटै दिए । उनले रोजगारको शिलशिलामा जापानमा रहेका नेपालीहरुलाई मायाको चिनो स्वरुप ढाका टोपी शिरमा लगाइदिएका थिए भने नेपालप्रतिको माया कहिल्यै नघटोस् भनेर आफुले साथमा ल्याएका राष्ट्रिय झण्डा पनि प्रदान गरे । ***
