समाचार सुन्नुहोस :
काठमाडौँ – नेकपा एमालेका अध्यक्ष तथा प्रधानमन्त्री केपी शर्मा ओलीले नेकपा एकीकृत समाजवादीलाई लक्षित गर्दै “समाजवाद नामका पसल” चल्न नदिने बताएका छन्। अनेरास्ववियुद्वारा स्ववियु निर्वाचनको सन्दर्भमा आयोजित कार्यक्रममा सम्बोधन गर्दै ओलीले एमालेको नीति र नेतृत्व मान्नेलाई स्वागत गरिने तर बार्गेनिङ गर्नेहरूलाई अवसर नदिइने स्पष्ट पारे।
ओलीले भने, “हाम्रो नीति र नेतृत्व स्वीकार गर्छन् भने आउन स्वागत छ, तर बार्गेनिङ गर्ने छुट छैन। समाजवादसँग कुनै साइनो नभएकाहरू समाजवादको नाम लिएर पसल खोल्न खोज्दैछन्। हामीले यस्ता पसल चल्न दिनु हुँदैन।” उनले अनावश्यक महत्त्व दिन नहुने भन्दै योग्यताका आधारमा मात्र जिम्मेवारी दिनेमा जोड दिए।
पार्टीभित्र प्रजातन्त्र र जनवादको नाममा अराजकता फैलाउने कामलाई बर्दाश्त नहुने बताउँदै अध्यक्ष ओलीले पार्टी तथा जनसंगठनहरूमा नेतृत्वको निर्णय स्वीकार्नुपर्ने आवश्यकता औंल्याए। उनले अनेरास्ववियु एकताबद्ध भएर आगामी फागुन १५ गतेको स्ववियु निर्वाचनमा विजय हासिल गर्ने विश्वास व्यक्त गरे।
