समाचार सुन्नुहोस :
काठमाडौँ – जनमत पार्टीका अध्यक्ष सिके राउतले नेपालमा दुई दलीय तानाशाही खपिनसक्नु भएको भन्दै आपत्ति जनाएका छन्। धार्मिक, भाषिक, सांस्कृतिक, भौगोलिक र जातीय विविधताले भरिएको देशमा साना समूहहरूको आवाज दबाउने उद्देश्यले निर्वाचन कानुन संशोधन गरी थ्रेस होल्ड बढाउन लागेकोप्रति राउतले सामाजिक सञ्जालमार्फत कडा आलोचना गरेका छन्।
राउतले फेसबुकमा लेखेका छन्, ‘नेपाल जस्तो धार्मिक, भाषिक, सांस्कृतिक, भौगोलिक र जातीय विविधतापूर्ण देशमा सानोभन्दा सानो समूहको आवाजको पनि प्रतिनिधित्व सदनमा हुनुपर्दछ ताकि उनीहरूले कम्तिमा आफ्ना समस्या सदनमा राख्न पाऊन्,’ उनले भनेका छन्, ‘कुनै ऐन–कानुन बन्दा आफूलाई प्रभावित कसरी गर्ने भन्ने कुरा सदनलाई बताउन सकोस्। त्यसका विपरीत ६–७ लाख गर्दै दसौं लाख (३०–४० लाख) जनताको मतलाई ‘खारेज’ गर्ने र त्यसको हिस्सा ठूला पार्टीमा चोर बाटोले जोड्ने निर्वाचन थ्रेस होल्डको प्रावधान आम जनतालाई स्वीकार्य हुन सक्दैन। हामी संघर्षका लागि तयार छौं। दुई दलीय तानाशाही नेपाललाई चाहिएको छैन।’
उनले समानुपातिक प्रणालीमा सुधारको नाममा प्रतिनिधिसभामा पाँच प्रतिशत र प्रदेशसभामा तीन प्रतिशत थ्रेस होल्ड लागू गर्न सरकारले कानुन संशोधन प्रक्रिया अघि बढाएको आरोप लगाए। हालको व्यवस्था अनुसार, प्रतिनिधिसभामा तीन प्रतिशत र प्रदेशसभामा डेढ प्रतिशतको थ्रेस होल्ड। जसलाई दोब्बर बनाउन खोजिएको उनले बताए।
