समाचार सुन्नुहोस :
काठमाडौँ – सूर्यदर्शन सहकारीका बचतकर्ताको रकम ठगी गरेको मुद्दामा प्रतिवादी रवि लामिछानेले पुर्पक्षका लागि थुनामा नराखी बाहिरै राख्न आग्रह गरेका छन्। थुनछेक बहसको अन्तिम दिन, न्यायाधीश नीतिज राईको इजलासमा आफ्नो धारणा राख्दै लामिछानेले बचतकर्ताको रकम फिर्ता गर्न पहल गर्ने सर्तमा थुनाबाहिर रहने अनुमति दिन अनुरोध गरे।
लामिछानेले गृहमन्त्री हुँदा शक्ति दुरुपयोग नगरेको र अब पनि त्यस्तो अवस्था नरहेको तर्क गरे। उनले अदालतले धरौटीमा छाड्ने निर्णय गरे आफूले बचतकर्ताको रकम फिर्ताका प्रयासहरूको रिपोर्ट अदालतमा पेस गर्ने बताए। उनले आफ्नो पार्टी राष्ट्रिय स्वतन्त्र पार्टी जिम्मेवार दल रहेको उल्लेख गर्दै सहकारी समस्याबारे तयार गरिएको ५५ पृष्ठ लामो प्रतिवेदन संसदीय छानबिन समितिले स्वीकार गरेको तथ्य प्रस्तुत गरे।
पुस १६ बाट कास्की जिल्ला अदालतमा सुरु भएको थुनछेक बहस बिहीबार सकिएसँगै फैसला आजै आउने सम्भावना छ। तर, धरौटीमा रिहा भए पनि लामिछाने तत्काल हिरासतबाट मुक्त नहुने देखिन्छ, किनभने अन्य चार जिल्लामा पनि अनुसन्धान जारी रहेको छ। यस्तै, काठमाडौँको स्वर्णलक्ष्मी सहकारी मुद्दामा समेत अभियोग दर्ता भइसकेको छ।
