समाचार सुन्नुहोस :
काठमाडौँ – रुकुमपश्चिमको चौरजहारी नगरपालिका–२ विजयश्वरीमा ३२ वर्षीया दीपा कुमालले ४० वर्षीय श्रीमान् मधु कुमालको हत्या गरेको घटना सार्वजनिक भएको छ।
जिल्ला प्रहरी कार्यालयका सूचना अधिकारी प्रहरी निरीक्षक ऋषि पाठकका अनुसार आज बिहान घरायसी विवादपछि दीपाले चिर्पटले टाउकोमा प्रहार गरी श्रीमान्को ज्यान लिएको प्रारम्भिक अनुसन्धानले देखाएको छ।
घटना भएपछि मृतकका १८ वर्षीय छोरा खिम कुमालले प्रहरीलाई खबर गरेका थिए। खबर पाएपछि इलाका प्रहरी कार्यालय चौरजहारीको टोली घटनास्थलमा पुगेको थियो। आरोपी दीपालाई प्रहरीले नियन्त्रणमा लिएको छ भने शव परीक्षणका लागि जिल्ला अस्पताल ल्याउने तयारी भइरहेको छ।
प्रहरीले घटनाको विस्तृत अनुसन्धान सुरु गरेको जनाएको छ। परिवारभित्रको विवादले यस प्रकारको गम्भीर घटना घटेको हुनसक्ने अनुमान गरिएको छ।
