टोकियो – जापानमा बस्दै आएका‘‘भ्लगर’ रतन कार्कीलाई माफी मागेका छन् । हालै काठमाडौंमा सम्पन्न दक्षिण एशियाली महिला फुटबल प्रतियोगिताको फाइनल खेलको दौरानमा प्रधानमन्त्री केपी शर्मा ओलीविरुद्ध नाराबाजी गर्न उक्साउने अभिव्यक्ति दिएपछि प्रहरीको निगरानीमा परेका उनले माफी मागेका हुन् ।
उनले खेल हेर्ने क्रममा आक्रोशित भएर त्यस्तो अभिव्यक्ति दिन पुगेको जनाउँदै अन्यथा नलिन आग्रह गरेका छन् । ‘खेल त सबैले हेर्नुभयो होला । हामीले जित्यौ वा हार्यौं, त्यो आफ्नै ठाउँमा छ । सिक्दैछौं । गेमको दौरानमा फ्रस्टेसनको कारण जिब्रो चिप्लिएको हो । मार्नुपर्छ भन्ने शब्द बोल्न पुगेँ । मेरो तात्पर्य गलत भयो । शैली कमेडी भयो । मार्नुपर्छ भन्दा फ्रस्टेसन पोखिएको हो, अलिकति नेगेटिभ इनर्जी भयो । तर यसलाई कुनै पनि पोलिटिकल व्यक्तिहरूले, कुर्सीमा बस्नुभएका व्यक्तिहरूले मलाई नै प्रहार गर्न खोजेको हो भनेर नबुझिदिनुहोला । मेरो इन्टेन्सन त्यस्तो थिएन । म सबैमा माफी माग्न चाहन्छु ’ उनले भिडियोमा भनेका छन् ।
खेलको क्रममा ‘प्रधानमन्त्रीलाई मार्न’ भन्दै रतन कार्कीले भिडिओ बनाएका थिए । त्यसपछि कार्कीको खोजीमा प्रहरी लागेको हो । उनी जापानमा रहेकाले पक्राउको लागि त्यहाँको प्रहरीसँग समन्वय भइरहेको प्रहरी स्रोतले जनाएको छ ।
