समाचार सुन्नुहोस :
काठमाडौँ – पूर्व गृहमन्त्री तथा राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध दायर गरिएको मुद्दामा थुनछेक बहस आजदेखि सुरु हुने भएको छ। अदालतमा हिजो उनको बयानको पालो नआएका कारण सुनुवाइ अघि बढ्न सकेको थिएन।
लामिछाने संघीय संसदको सांसद पदबाट हिजो निलम्बनमा परेका थिए। कास्की जिल्ला अदालतले थुनछेक बहसपछि उनीसहित अन्य प्रतिवादीलाई धरौटी, साधारण तारेख, वा पुर्पक्षका लागि थुनामा पठाउने आदेश दिन्छ।
सरकारी वकिलको कार्यालय, कास्कीले सहकारी ठगीसम्बन्धी मुद्दामा लामिछाने र छविलाल जोशीसहित ४४ जनालाई प्रतिवादी बनाउँदै मुद्दा दर्ता गरेको छ। पाँच जनालाई भने बिगोअनुसारको सम्पत्ति जफतको लागि मात्र प्रतिवादी कायम गरिएको छ।
लामिछानेमाथि तीन फरक अभियोग दर्ता गरिएको छ– सङ्गठित अपराध, सहकारी ठगी र सम्पत्ति शुद्धीकरण। गोर्खा मिडियाका अध्यक्ष जीबी राईसहित १९ जनाविरुद्ध थप अभियोग हालै मात्र दर्ता भएको थियो।
प्रहरीको अनुसन्धानले रवि लामिछाने र समूहले सूर्यदर्शन सहकारीबाट १ अर्ब ५१ करोड अपचलन गरेको देखाएको छ। सहकारीको रकम गोरखा मिडिया नेटवर्कमा लगेर ५ करोड ४८ लाखको दुरुपयोग गरिएको पाइएको छ। लामिछाने कात्तिक २ गते काठमाडौंमा पक्राउ परेका थिए।
