समाचार सुन्नुहोस :
काठमाडौँ – नेपाल प्रिमियर लिग (एनपिएल) को फाइनल खेलका दौरान अभद्र व्यवहार प्रदर्शन गरेको आरोपमा दुई व्यक्तिलाई प्रहरीले नियन्त्रणमा लिएको छ। पक्राउ परेकाहरूमा डोटी आदर्श गाउँपालिकाका २१ वर्षीय अशोक साउद र डोटी दीपायल सिलगढी नगरपालिकाका १९ वर्षीय गणेश साउद रहेका छन्। उनीहरूको गिरफ्तारीबारे जिल्ला प्रहरी परिसर काठमाडौंका प्रहरी उपरीक्षक नवराज अधिकारीले जानकारी दिएका हुन्।
कीर्तिपुरस्थित त्रिभुवन विश्वविद्यालय क्रिकेट मैदानमा पुस ६ गते जनकपुर बोल्ट्स र सुदूरपश्चिम रोयल्सबीचको खेलपछि केही व्यक्तिहरूबीच विवाद भएको थियो। झगडाको क्रममा आपत्तिजनक भाषा प्रयोग गर्ने, साम्प्रदायिक सद्भाव खलल पार्ने प्रयास गर्ने र अन्य अभद्र गतिविधिहरू भएको आरोप लागेको छ।
प्रहरीले विभिन्न माध्यमबाट प्राप्त सूचनाको आधारमा अनुसन्धान अघि बढाउँदै दुईजनालाई पक्राउ गरेको हो। यसै क्रममा घटनामा संलग्न अन्य व्यक्तिहरूको खोजी कार्य जारी रहेको प्रहरी उपरीक्षक अधिकारीले बताएका छन्।
