काठमाडौं – हुलाकी राजमार्ग अन्तर्गतको १० वटा सडक निर्माणका लागि नेपाल सरकारलाई भारत सरकारले झण्डै २४ करोड रकम भुक्तानी गरेको छ । भारतीय राजदुत मन्जिवसिंह पुरीले अाज भौतिक पूर्वाधार तथा यातायात मन्त्रालयका सचिव देवेन्द्र कार्कीलाई हुलाकी राजमार्ग अन्तर्गतको १० वटा सडक निर्माणका लागि लाग्ने कूल बजेटको २५ प्रतिशत रकमको चेक हस्तान्तरण गर्नु भएको हो ।
जस अन्तर्गत भारतले नेपाललाई १४ करोड ८३ लाख ६७ हजार ९ सय ७८ रुपैँया भारू अग्रिम भुक्तानी गरेको हो । नेपाल सरकार र भारत सरकारबीच हुलाकी राजमार्ग अन्तर्गतको १० वटा सडक निर्माण भारत सरकारले गर्ने समझदारी भएको थियो । सोही समझदारी अनुसार काम अघि बढाउन अाज भौतिक पूर्वाधार तथा यातायात मन्त्रालयमा आयोजित एक कार्यक्रमका बीच भारतीय राजदुत पुरीले सचिव कार्कीलाई १४ करोड ८३ लाख ६७ हजार ९ सय ७८ भारतीय रूपैँयाको चेक हस्तान्तरण गर्नु भएको हो ।
कार्यक्रममा बोल्दै भौतिक पूर्वाधार तथा यातायात मन्त्रालयका सचिव कार्कीले भारतले हुलाकी राजमार्ग अन्तरगतको १० वटा सडक निर्माणका लागि २५ प्रतिशत रकम अग्रिम भुक्तानी गरेर सहयोग गरेकोमा आभार व्यक्त गर्नु भयो । उहाँले भारत सरकारको आर्थिक सहयोगमा संचालित सडक निर्माणको काम समयमै सम्पन्न हुने प्रतिवद्धता पनि व्यक्त गर्नु भयो । भारतीय राजदुत सिंहले हुलाकी राजमार्ग अन्तरगतका १० वटा सडक निर्माणका लागि सहकार्य गर्ने अवसर पाएकोमा भारत सरकार खुसी रहेको उल्लेख गर्नु भयो । उहाँले भारत नेपालको पूर्वाधार विकासमा आवश्यक लगानी गर्न सधैं तयार रहेको पनि बताउनु भयो ।
राष्ट्रिय गौरवको आयोजना हुलाकी राजमार्ग अन्तरगतको १० वटा सडक निर्माणका लागि भारत सरकारले सहयोग गर्ने समझदारी भएको छ । सोही कामका लागि भारत सरकारले कूल लागतको २५ प्रतिशत रकम बुधबार नेपाल सरकारलाई उपलब्ध गराएको हो । भौतिक पूर्वाधार तथा यातायात मन्त्रालयले भारतको आर्थिक सहायतामा बनाउन लागिएको १० वटा सडक मध्ये ९ वटाको ठेक्का दिने काम सम्पन्न भएको र बाँकि १ वटाको पनि ठेक्का दिने प्रक्रिया सुरु भईसकेको स्पष्ट पारेको छ ।
