समाचार सुन्नुहोस :
काठमाडौँ – राष्ट्रिय स्वतन्त्र पार्टी (रास्वपा) का सभापति तथा निलम्बित सांसद रवि लामिछानेविरुद्ध कास्की जिल्ला अदालतमा दायर भएको सहकारी ठगी मुद्दामा आज (शुक्रबार) पनि बयान जारी रहनेछ। न्यायाधीश नीतिज राईको इजलासमा बिहीबार सुरु भएको बयान करिब दुई घण्टा चलेको थियो। अदालतका सूचना अधिकारी सुरज अधिकारीका अनुसार लामिछानेको बाँकी बयान आज जारी हुनेछ।
यसअघि सोमबार र मंगलबार अदालत पुगे पनि पालो नआएकाले लामिछानेले बयान दिन पाएका थिएनन्। मंगलबार गोर्खा मिडियाका पूर्वउपाध्यक्ष तथा पूर्वडीआईजी छविलाल जोशीसँगको बयान सकिएपछि फेरी लिला पछाईसँग बयान लिन सुरु गरिएको थियो। जसका कारण लामिछानेको पालो ढिला गरि आएको हो।
सरकारी वकिलको कार्यालय, कास्कीले रवि लामिछाने, छविलाल जोशीसहित ४४ जनाविरुद्ध सहकारी ठगीको आरोपमा मुद्दा दर्ता गरेको छ। पाँच जनालाई बिगोअनुसार सम्पत्ति जफत प्रयोजनका लागि प्रतिवादी बनाइएको छ। लामिछानेविरुद्ध सङ्गठित अपराध, सहकारी ठगी र सम्पत्ति शुद्धीकरण अभियोगमा मुद्दा चलाइएको छ। अदालतले सुनुवाइपछि रविलाई धरौटी, साधारण तारेखमा रिहा गर्ने वा पुर्पक्षमा थुनामा राख्नेबारे आदेश दिनेछ।
