काठमाडौं – नेकपा माओवादी केन्द्रका उपमहासचिव जनार्दन शर्माले कम्युनिस्ट पार्टीको सत्तामोहप्रति गम्भीर प्रश्न उठाएका छन् । १३२ औँ माओ दिवसका अवसरमा सार्वजनिक नीति तथा रणनीतिक अध्ययन केन्द्र, नेपालद्वारा प्रज्ञा भवनमा आयोजित कार्यक्रममा उनले पार्टीको हालको अवस्थाप्रति चिन्ता व्यक्त गरेको हुन् ।
शर्माले भ्रष्टाचारका कारण पार्टीको छवि धमिलिएको बताउँदै भने, ‘कम्युनिस्ट पार्टीका प्रधानमन्त्रीहरूले भ्रष्टाचारको दलदलबाट माथि उठ्न नसक्दा जनताले गम्भीर प्रश्न गरेका छन् । अब वैचारिक र राजनीतिक पुनर्गठनको समय आएको छ ।’
उनले नेपालका कम्युनिस्ट आन्दोलनले माओबाट पाठ सिक्नुपर्ने आवश्यकतामाथि जोड दिए । उनले दलाल पुँजीवाद र नोकरशाहीविरुद्धको संघर्षलाई पुनर्स्थापित गर्नुपर्ने बताउँदै, नेपालको वर्तमान राजनीतिक अवस्था ‘न हास, न बकुल्लाको चाल’ जस्तो भएको टिप्पणी गरे ।
उनले अबको कम्युनिस्ट आन्दोलनले सत्ताको खेलभन्दा पर गइर जनताको जीवनस्तर सुधार्न ध्यान केन्द्रित गर्नुपर्ने धारणा व्यक्त गरे । ‘सत्ताको लागि झिनाझम्टिमा अल्झिरहने हो कि जनजीविकाका मुद्दा समाधान गर्दै अगाडि बढ्ने ?’ शर्माको प्रश्न थियो ।
