टोकियो – नेपालमा राजनीतिक अस्थिरताका बीच पनि लगानी गर्ने वातावरण रहेको भन्दै विदेशमा रहेका नेपालीहरुलाई स्वदेशमा लगानी गर्नको लागि युवा संघ नेपालको केन्द्रिय विदेश विभाग प्रमुख सन्तोष रावलले आग्रह गर्नुभयो ।
प्रवासी नेपाली मञ्च, जापानले योकोहामामा आयोजना गरेको कार्यक्रममा बोल्दै रावलले विभिन्न बाधा र अबरोधकोबीच देशको विकास तीव्र रुपमा भएको बताउनु भयो । उहाँले देशमै लगानी गर्न सके कोहीपनि विदेश जान नपर्ने समेत दाबी गर्नुभयो । एमालेले २९ हजार घर, टहरा बनाएको बताउँदै ओली सरकारले बोलेको कुरा सफल हुँदै गएको उहाँको भनाइ थियो । मुस्ताङमा हावाबाट निकालेको विजुलीको केही समय पछि उद्घाटन हुने भन्दै सरकारले अब विकासका काम तिव्र रुपमा अघि बढाएको बताउनु भयो । अहिले सरकार परिवर्तन हल्ला मात्र भएको बताउँदै रावलले सयम आएपछि माओवादी, काँग्रेसलगायत सबै दललाई मिलाएर राष्ट्रिय सहमतिको सरकार बन्ने बताउनु भयो । लाईन्स क्लबको एक कार्यक्रममा रावल जापान आउनु भएको थियो ।
मञ्चले राखेको सम्मान कार्यक्रममा युवा संघको सचिवालय सदस्य तथा विदेश विभाग प्रमुख सन्तोष रावल, एमाले म्याग्दीको नेता तथा व्यवसायी सरोज बानिया, नविना थापालगायतलाई खादा लगाएर सम्मान गरेको यियो ।
कार्यक्रममा प्रवासी नेपाली मञ्च राष्ट्रिय कमिटी जापानका उपाध्यक्ष मोहन रायमाझी, सचिव राजेन्द्र श्रेष्ठ, सदस्य सिद्धार्थ श्रेष्ठ, अशोक पुरी, प्रवासी नेपाली मञ्च कान्तो कमिटीका अध्यक्ष देविलाल भण्डारी, सचिव बुद्धिराज घिमिरेलगायत एमालेका नेता कार्यकर्ताको सहभागि रहेको थियो । प्रवासी नेपाली मञ्च, जापानका अध्यक्ष कृष्ण खड्काको सभापतित्वमा भएको सो कार्यक्रम मञ्चका महासचिव कुलचन्द्र खरेलले गर्नु भएको थियो ।
