काठमाडौं – राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध सहकारी ठगी प्रकरणमा मुद्दा दायर भएपछि सोमबारदेखि थुनछेक बहस हुने भएको छ । कास्की जिल्ला अदालतमा मुद्दा गोला प्रथाबाट जाने प्रक्रियाअन्तर्गत न्यायाधीशको बेन्च तोकिएपछि बहस सुरु हुनेछ । त्यसपछि बेन्चले लामिछाने र अन्य प्रतिवादीहरूलाई धरौटी, साधारण तारेख वा पुर्पक्षका लागि थुनामा पठाउने सम्बन्धमा निर्णय गर्नेछ ।
आइतबार लामिछानेसहितका प्रतिवादीहरूमाथि सहकारी ठगी, सङ्गठित अपराध र सम्पत्ति शुद्धीकरणको मुद्दा दायर भएको हो । जिल्ला सरकारी वकिलको कार्यालय, कास्कीका सहायक जिल्ला न्यायाधिवक्ता शान्तिदेवी शर्माका अनुसार लामिछानेमाथि पोखराको सूर्यदर्शन सहकारीका बचतकर्ताको रकम अपचलन गरेको आरोप छ ।
लामिछानेमाथि २७ करोड ८९ लाख ४४ हजार सात सय पाँच सम्पत्ति शुद्धीकरण र तीन करोड ३७ लाख ६५ हजार सहकारी ठगीसम्बन्धी बिगो दाबी गरिएको छ । उनी कास्की जिल्ला प्रहरी कार्यालयको हिरासतमा छन् ।
सहकारी ठगी प्रकरणमा लामिछानेसहित रामबहादुर खनाल, छविलाल जोशी, र लीला पछाइविरुद्ध पनि मुद्दा दायर गरिएको छ । प्रतिवादी खनालसँग १४ करोड ३० लाख ९१ हजार नौ सय ११, जोशीसँग ७४ करोड ३४ लाख ७१ हजार ५५, र पछाइसँग २४ करोड ६७ लाख सात हजार २४ सम्पत्ति शुद्धीकरणको आरोपमा दाबी गरिएको छ ।
अधिकतम २४ वर्षसम्म कैद सजायको मागदाबी
सम्पत्ति शुद्धीकरण निवारण ऐन-२०६४ अनुसार लामिछानेलाई २ देखि १५ वर्षसम्म कैद सजाय हुन मागदाबी गरिएको छ । त्यस्तै सहकारी ठगीमा ४ देखि ६ वर्ष सजाय गर्नुपर्ने मागदाबी लिइएको छ ।
सहकारी ऐन-२०७४ को दफा (१२४) बमोजिम १ करोड देखी १० करोड सम्म बिगो भएमा ४ देखि ६ वर्ष कैद हुने व्यवस्था छ । लामिछानेविरुद्ध सहकारी ठगीमा ३ करोड ३७ लाख बिगो मागदाबी लिइएको छ ।
सरकारले उनीविरुद्ध संगठित अपराधको कसुर पनि लगाएको छ । संगठित अपराध निवारण ऐन-२०७० अनुसार थप ५० प्रतिशत सजाय हुने व्यवस्था छ । उनीविरुद्ध दायर गरिएको अभियोग पत्र अनुसार कम्तीमा २४ वर्ष सजाय हुन मागदाबी लिइएको छ ।
