काठमाडौं – पूर्वगृहमन्त्री तथा राष्ट्रिय स्वतन्त्र पार्टीका सभापति रवि लामिछानेविरुद्ध २७ करोड ८९ लाख रुपैयाँ गैरकानुनी रुपमा आर्जन गरेको आरोप लगाउँदै जिल्ला सरकारी वकिलको कार्यालय कास्कीले मुद्दा दायर गरेको छ । उक्त प्रकरणमा उनकी पत्नी निकिता पौडेललाई समेत प्रतिवादी बनाइएको छ ।
जिल्ला सरकारी वकिल कार्यालयकी सहायक जिल्ला न्यायाधीवक्ता शान्तिदेवी शर्माका अनुसार रविमाथि २७ करोड ८९ लाख रुपैयाँ बिगो मागदाबी गरिएको छ । तर, निकिता पौडेलविरुद्ध लगाइएको आरोपका सम्बन्धमा भने विस्तृत जानकारी दिइएको छैन । यस मुद्दामा निकितासहित पाँच जनालाई जफत प्रयोजन का लागि प्रतिवादी बनाइएको हो ।
यस अन्तर्गत, कसुरमा संलग्न नभएको व्यक्तिको खातामा अपराधबाट आर्जित सम्पत्ति देखिएमा त्यसलाई जफत गर्ने प्रचलन रहेको बताइएको छ । प्रतिवादी बनाइएका अन्य व्यक्तिहरूमा पद्मा बन्जाडे, रोचक जोशी, राधा पछाईं, र गीता पछाईं समावेश छन् । उनीहरूका साथमा रहेको सम्पत्ति अपराधबाट आर्जन भएको पुष्टि भएमा, अभियोगमा मागदाबी गरिएको सम्पत्ति जफत गरिने छ । तर, उनीहरूलाई अन्य कुनै दण्डसजाय भने लाग्ने छैन ।
शर्माका अनुसार आइतबार दायर गरिएको मुद्दामा ३१ जनालाई प्रतिवादी बनाइएकोमा ८ वटा कम्पनीहरू पनि समावेश छन् । पाँच जनालाई भने विशेषतः सम्पत्ति जफतको लागि मात्र मुद्दा चलाइएको हो । यो प्रकरणमा कूल ६३ जनाविरुद्ध मुद्दा दायर गरिएको उनले जानकारी दिइन् ।
सम्पत्ति शुद्धीकरणको यो मामिलामा रवि लामिछाने, उनकी पत्नी निकिता पौडेल, छविलाल जोशीकी श्रीमती पद्मा बन्जाडे, छोरा रोचक जोशी, लिला पछाईंकी आमा राधा पछाईं, तथा दिदी गीता पछाईंको सम्पत्ति जफत गर्न माग गरिएको छ ।
