समाचार सुन्नुहोस :
काठमाडौँ – अष्ट्रेलियाको भिक्टोरिया राज्यमा लागेको आगो नियन्त्रण बाहिर गएको छ। आगलागी नियन्त्रण गर्न सकस भएपछि सरकारले हजारौँ स्थानीयलाई सुरक्षित स्थानतर्फ सार्न आदेश दिएको छ। झन्डै ५ सय व्यक्तिको उद्धार गरिएको छ। मेलबर्नबाट करिब २४१ किलोमिटर पश्चिममा रहेको ग्राम्पियन्स नेशनल पार्क र त्यस वरपर फैलिएको डढेलोले ३४ हजार हेक्टर क्षेत्र जलेको छ।
आपतकालीन सेवा एजेन्सीका अनुसार, जङ्गलमा पर्याप्त कच्चा इन्धन उपलब्ध भएकाले आगो निभाउन थप कठिनाइ भइरहेको छ।गएको मङ्गलवार परेको चट्याङपछि सुरु भएको यो आगलागी हिजो शनिबारसम्म नियन्त्रणमा आउन सकेको छैन। घटनास्थलमा सयभन्दा बढी ट्याङ्कर र २५ वटा विमान परिचालन गरिएको भएपनि आगो नियन्त्रणमा लिन नसकेको रोयटर्सले जनाएको छ।
अष्ट्रेलियाली अधिकारीहरूले यो गर्मीको मौसममा जङ्गली डढेलोको जोखिम उच्च रहेको चेतावनी दिएका छन्। यसप्रकारका घटनाबाट सुरक्षित रहन सबैलाई सचेत रहन आग्रह गरिएको छ।
