समाचार सुन्नुहोस :
काठमाडौँ – सञ्चार तथा सूचना प्रविधि मन्त्री पृथ्वीसुब्बा गुरुङले अनलाइन मिडियाको अराजकता रोक्न अध्यादेशमार्फत कदम उठाउनुपर्ने चेतावनी दिएका छन्। आइतबार नेपाल पत्रकार महासङ्घ कास्कीका नवनिर्वाचित पदाधिकारीहरूको सपथग्रहण तथा पदभार कार्यक्रममा बोल्दै उनले केही अनलाइन मिडियाले पत्रकारिताका सिद्धान्त र कानुनी मान्यता उल्लङ्घन गरेको आरोप लगाए।
उनका अनुसार, यस्ता मिडियाहरूलाई नियमन मात्र नभई नियन्त्रण पनि गर्नुपर्ने आवश्यकता छ। मन्त्री गुरुङले पत्रकारितामा मर्यादा र ऐन, कानुनको पालनालाई प्राथमिकता दिनुपर्नेमा जोड दिदै नियम मानेर नचालिने मिडियाहरूलाई कडा कदम चाल्नुपर्ने स्थिति आएको बताए।
अनलाइन मिडियाको प्रभावकारी नियमनका लागि तयार पारिएको विधेयक हिउँदे अधिवेशनबाट पारित गरिने योजना रहेको जानकारी गराउँदै मन्त्रीले भने, “संसद बोलाउन तत्काल सम्भव नभएमा, अध्यादेशमार्फत विधेयक ल्याउनुपर्ने अवस्था आउन सक्छ।” उनले मिडियाको जिम्मेवार भूमिका सुनिश्चित गर्न सरकारले आवश्यक कदम चाल्ने प्रतिबद्धता व्यक्त गरे।
