जाजरकोट – पुल नहुँदा वर्षाको समयमा रुकुमको घेत्माखोला तर्न निकै सकस छ । सामान्य मान्छे आफ्नै बलबुताले खोला तर्न सक्दैनन् । खोला तर्न बनाइएको काठेपुल बुधवार आएको बाढीले बगाएपछि थप समस्या थपिएको छ ।
अहिले केही स्थानीय बासिन्दाले खोलामा काठ राखेर डोरीको सहायताले खोला तर्न सहयोग गरिरहेका छन् । रुकुम, जाजरकोट र डोल्पाका मानिस आवतजावत गर्ने प्रमुख बाटोमा पर्ने घेत्माखोलामा पक्की पुल नहुँदा बर्से्नि यस्तै हैरानी हुन्छ । जिल्लामा भएका विकास निर्माणको अनुगमन गर्न गाउँ आउनुभएकी जाजरकोटकी सांसद रीता रावललाई पनि घेत्माखोला तर्न उस्तै सकस भयो । स्थानीय बासिन्दाको सहयोगमा खोला तरेपछि सांसद रावलले २५ रुपैयाँ दिनुभयो । उहाँसँग मात्रै होइन खोला तारेर सहयोग गरेबापत सबैले २५ रुपैयाँ दिनुपर्ने खोला तार्दै आउनुभएका स्थानीयवासी सेतु खत्रीले बताउनुभयो ।
जाजरकोट–डोल्पा सडकको राडी छेपारे सडकखण्डमा पर्ने रुकुमको घेत्माखोला तारिदिएबापत सांसद रावलले २५ रुपैयाँ तिर्नुभएको हो । ‘सहयोग बिना खोला तर्न गाह्रो छ’, खोला तरेपछि एक यात्रु सुनिता बोहराले भन्नुभयो । खोलाबाट वारपार गर्न समस्या भएपछि प्रतिव्यक्ति २५ रुपैयाँ लिएर काठ र डोरीको सहायताले यात्रुलाई तार्ने गरेको खत्रीले बताउनुभयो ।
खोलामा पुल बनाउनका लागि धेरै पटक हारगुहार गरे पनि बजेट नपरेको उहाँले गुनासो गर्नुभयो । उहाँले यात्रुलाई सहयोग गर्न भनेर जोखिम मोलेरै भए पनि खोला तार्ने गरेको बताउनुभयो । खोला बढेपछि यातायातका साधनसमेत तर्न सक्दैनन् ।
यात्रुले रकम तिरेर खोला तर्न बाध्य भएको र यातायातका साधन तर्ने गरी पक्की पुलको व्यवस्थाका लागि आफूले सम्बन्धित निकायमा पहल गर्ने सांसद रावलले बताउनुभयो । घेत्मा खोलाको यो क्षेत्र रुकुम क्षेत्र नं २ का सांसद एवम् पूर्वमन्त्री जनार्दन शर्माको क्षेत्र भएपनि पुल भने छैन् ।
