समाचार सुन्नुहोस :
काठमाडौँ – प्रधानमन्त्री केपी शर्मा ओलीले नेपाल प्रिमियर लिग (एनपीएल) को पहिलो संस्करणको उपाधि जितेको जनकपुर बोल्ट्सलाई बधाई दिँदै सम्मान गरेका छन्। आइतबार बालुवाटारमा आयोजित कार्यक्रममा प्रधानमन्त्री ओलीले नेपाली क्रिकेटको स्तर उकास्न महत्वपूर्ण योगदान पु-याएको भन्दै जनकपुर बोल्ट्सका क्याप्टेन, खेलाडी, नेपाल क्रिकेट संघ र व्यवस्थापकहरूको प्रशंसा गरे।
जनकपुर बोल्ट्सले शनिबार कीर्तिपुर क्रिकेट मैदानमा सुदूरपश्चिम रोयल्सलाई हराउँदै उपाधि जितेको थियो। प्रधानमन्त्रीले आगामी दिनमा थप सफलताको कामना गर्दै आत्मबल र उत्साहलाई कायम राख्न आग्रह गरे। “तपाईंहरूको जितले नेपाली क्रिकेटको उज्ज्वल भविष्य देखाएको छ,” प्रधानमन्त्रीले भने।
प्रधानमन्त्री ओलीले आफूले पदबहाली गरेका प्रारम्भिक दिनमा कीर्तिपुर क्रिकेट मैदानको स्तर उन्नतिका लागि निर्णय गरेको र खेल क्षेत्रको विकासका लागि सरकारी प्रयास निरन्तर रहने प्रतिबद्धता दोहोर्याए। साथै, सरकारले विदेशी खेलाडी तथा लगानी भित्र्याउन देखिएका झञ्झट हटाउन आवश्यक सहजीकरण गर्ने विश्वास दिलाए। जनकपुर बोल्ट्सका क्याप्टेन आसिफ शेखले प्रधानमन्त्रीबाट प्राप्त बधाई र सम्मानले आफ्नो टोलीलाई अझ उत्साहित बनाएको बताए।
