टोकियो – जापानलाई कर्मघर रोजेका बागलुङ बिहुँकोटका नारायण कँडेलको अर्को म्युजिक भिडियो ’सलामी’ बजारमा आएको छ ।
राष्ट्रभक्ति तथा देशप्रेमका गीत लेखनमा कलम चलाउँदै आएका गीतकार कँडेलको यो छैंठौ एल्बम हो । उसो त उनले दर्जनौ गीत लेखिसकेका छन् ।
’चाँहिदैन मलाई तोपको सम्मान चाँहिदैन सलामी, बनाउन सकूँ खुशीले बोक्ने चारजना मलामी, खै के छ तिर्ने ? खोज्दैछु आमा दूधको साटोमा, मिसाउन सकूँ दुई थोपा रगत जन्मेको माटोमा’ जस्ता गहकिला र मर्मश्पर्शी शब्दमा उनिएका कँडेलका देशप्रेम गीत चर्चित गायक प्रमोद खरेलको आवाजमा सजिएका छन् ।
नेपाल प्रहरीका सेलिब्रेटी एसएसपी रमेश खरेलको प्रमुख अभिनय रहेको सो म्युजिक भिडियोमा अर्जुन पोखरेलको संगीत रहेको छ भने सशान कँडेलको निर्देशन रहेको छ । अर्जुन तिवारीको छायाङ्कनमा बनेको सो म्युजिक भिडियोमा निशान घिमिरेले सम्पादन गरेका छन् ।
समुद्रपारिसंग संक्षिप्त कुरा गर्दै गीतकार कँडेलले मान सम्मान पाउनका लागि भन्दा पनि समाज रुपान्तरणका लागि मानिस बाँच्नुपर्ने र त्यसका लागि आफु जन्मेको माटोमा दुई थोपा रगत मिसाउन सक्नुपर्ने सन्देश गीतले दिन खोजेको बताए ।
जापानका लागि कार्यवाहक राजदूत गेहेन्द्र राजभण्डारीले गीतकार कँडेललाई शुभकामना दिदैं भनेका छन् – ‘नेपाली गीत संगीत, साहित्य, कला र सँस्कृतिको श्रीबृद्धि गर्ने कार्यले निरन्तरता पाईरहोस ।’
यस अघि केही महिना अगाडि मात्र बजारमा आएको कँडेलको ‘यस्तै छ कहानी परदेशीको’ म्यूजिक भिडियोले निकै चर्चा पाईरहेको छ । ***
