’सुजु’ र ’टेक’ को जोडी पनि म्यूजिक भिडियोमा जम्दै
टोकियो – ’एउटा कुरा मनमा थियो भन्न गाह्रो भयो, तिम्रो बारे केही कुरा जान्न गाह्रो भयो’ बोलको गीतमा जापानमै छायाङ्कन गरिएको म्युजिक भिडियो सार्बजनिकएकोछ । हालै सम्पन्न तामाङ ल्होसार कार्यक्रमका अवसरमा उक्त म्युजिक भिडियो विमोचन गरिएको हो । उक्त म्युजिक भिडियोको तामाङ समाज जापानका वरिष्ठ सल्लाहकार रेख ब्लोन तामाङले विमोचन गर्नुभएको थियो ।
गायक सञ्जिव तामाङको स्वरमा सजिएको उक्त गीतमा सुजु तामाङ र टेक गुरुङको प्रमुख अभिनय रहेको छ भने उनीहरुलाई मिनामी एलिज, बिश्वास, नास्मिक, निर, एकराज लगायतले सघाएका छन् ।
सञ्जिव वाइवाकै शब्द अनि संगीत रहेको सो गीतको म्युजिक भिडियोको छायाङ्कन तथा निर्देशन ओम प्रकाश गुरुङले गरेका हुन् भने सम्पादन प्रविण हिराचनको रहेको छ । करिब साढे ४ मिनेटको उक्त म्युजिक भिडियो हेरेर प्रतिक्रिया दिन सिंगो युनिटले जापानबासी नेपालीहरुमा अपिल गरेको छ ।
पछिल्ला समयमा जापानमै म्युजिक भिडियो उत्पादन गर्ने लहर ह्वात्तै बढेपछि आफ्नो पनि अनायसै ब्यस्तता बढेको सुजुले समुद्रपारिलाई बताईन् । यसबाहेक उनको अन्य म्युजिक भिडियो पनि छिट्टै बजारमा आउने क्रममा रहेको छ भने आशबिर तामाङको शब्द, संगीत र आवाजमा स्वरबद्ध जापानी सेलोमा नेपाली मिक्स ’होप’ को म्युजिक भिडियोमा पनि अभिनयका लागि सुजु अनुबन्धित भईसकेकी छिन् । ***
